Avropa futbolunda mövsümün ən məhsuldar hücumçusuna təqdim olunan “Qızıl buts” mükafatı uğrunda mübarizədə son vəziyyət açıqlanıb. Hazırda siyahıya Almaniya Bundesliqasında çıxış edən Harri Keyn başçılıq edir.
İngiltərə millisinin kapitanı cari mövsümdə Bundesliqada 30 qol vuraraq 60 xal toplayıb və reytinqin zirvəsində qərarlaşıb. Məlum olduğu kimi, Avropanın “top-5” çempionatlarında hər qol 2 xal kimi hesablanır.
Mbappe və Holand ilk üçlükdə
Reytinqdə ikinci pilləni Madrid “Real”ının fransalı ulduzu Kilian Mbappe tutur. O, La Liqada vurduğu 23 qol sayəsində 46 xal toplayıb və liderdən 14 xal geri qalır. İlk üçlüyü isə “Mançester Siti”nin norveçli bombardiri Erlinq Holand tamamlayır. Onun hesabında 22 qol və 44 xal var.
Qeyd edək ki, “Qızıl buts” hesablanarkən çempionatların güc əmsalı nəzərə alınır:
- Top-5 liqalarda hər qol – 2 xal;
- Güc sıralamasında 6–21-ci yerlərdə olan liqalarda – 1,5 xal;
- Digər çempionatlarda isə – 1 xal.
Xatırladaq ki, ötən – 2024/25 mövsümünün qalibi məhz Kilian Mbappe olub. Fransa millisinin hücumçusu La Liqadakı debüt ilində bu mükafata layiq görülmüşdü.
Mövsümün sonuna hələ kifayət qədər vaxt qaldığından liderlik uğrunda mübarizənin daha da gərginləşəcəyi gözlənilir.
