Real Madrid dünya futbol tarixində ən böyük transferlərdən birini reallaşdırmağa hazırlaşır. Madrid klubu Arsenalın mərkəz müdafiəçisi, 22 yaşlı fransız oyunçu William Salibanı transfer etmək üçün 100 milyon avro və ya daha yüksək məbləğ təklif etməyə hazırdır.
Sport-Az məlumatına görə, Real Madrid artıq Salibanın nümayəndələri ilə ilkin danışıqlar aparıb və müsbət cavab alıb. Hazırda klub danışıqları məxfi şəkildə davam etdirir və Salibanın transfer üçün Arsenal rəhbərliyinə müraciət etməsini təmin etmək istəyir.
Xatırladaq ki, William Saliba 2019-cu ildə Saint-Etienne klubundan Arsenal komandasına 30 milyon avroya transfer olmuşdu.
Əgər bu transfer baş tutarsa, Saliba 2019-cu ildə Harry Maguire-in Manchester United tərəfindən 87 milyon avroya Leicester City-dən alınmasını keçərək, futbol tarixində ən bahalı müdafiəçi olacaq.
