Səudiyyə Ərəbistanı dünyada ilk dəfə “səma stadionu” inşa etməyə hazırlaşır. Hələlik NEOM Stadium adlandırılan obyekt yer səthindən yüksəkdə yerləşəcək, layihəyə dair yeni qeyri-rəsmi konseptual video isə sosial şəbəkələrdə böyük maraq doğurub.
Süni intellektin köməyi ilə hazırlanmış vizuallaşdırmalarda stadionun göydələnin zirvəsində yerləşəcəyi göstərilir. Arenanın 350 metr hündürlükdə 46 min tamaşaçı tutumu olacağı gözlənilir.
Bu layihə Səudiyyə Ərəbistanının 2034-cü il futbol üzrə dünya çempionatı ərəfəsində reallaşdırmaq istədiyi yüksək texnologiyalı konseptlərdən biridir. Ötən il ölkə turnirə qədər tamamlanmalı olan 15 futuristik stadion layihəsini təqdim etmişdi.
Onlardan biri də NEOM Stadium idi — stadionun göydələnin zirvəsində tikilməsi planlaşdırılır. Tikintinin 2027-ci ildə başlanması və 2032-ci ildə başa çatdırılması, bununla da iki il sonra keçiriləcək dünya çempionatına tam hazır olması nəzərdə tutulur.
Yeni yayımlanan vizualların stadionun orijinal planından fərqli olub-olmadığı hələ təsdiqlənməyib. Hazırda bu məsələ ətrafındakı maraq əsasən sosial mediada yayılan qısa videoya əsaslanan ehtimallardan ibarətdir.
