Avrokubokların Liqa mərhələsinin III turunun oyunlarından sonra Sloveniya UEFA reytinqində Azərbaycanın sırasına yaxınlaşmaqdadır. Bu vəziyyət dünən gecə “Sele” klubunun UEFA Konfrans Liqasında İrlandiyanın “Şemrok Rovers” komandasını 2:0 hesabı ilə məğlub etməsi nəticəsində baş verib.
Bu qələbə Sloveniya üçün UEFA reytinqinə 21.718 bal əlavə edib və ölkəni 26-cı pilləyə qaldırıb. Hal-hazırda Azərbaycan 22.000 balla 25-ci, Serbiya isə 22.375 balla 24-cü yerdə qərarlaşıb.
Eyni zamanda, Azərbaycan çempionu “Qarabağ” Çempionlar Liqasının əsas mərhələsində İspaniyada “Atletik” qarşısında 1:3 hesabı ilə uduzub.
Qeyd edək ki, UEFA reytinq siyahısında İngiltərə 99.005 bal toplayaraq lider mövqedədir.
