25 yaşlı “Indiana Pacers” oyunqurucusu Tayriz Haliburton “Charlotte Hornets”ə qarşı keçirdiyi oyunda NBA tarixində əlamətdar nəticəyə imza atdı. O, bu görüşdə 22 xal və 10 assistlə yadda qaldı, ən təsirli tərəfi isə top itkisinə yol verməməsi oldu.
Bu, Haliburton üçün karyerasında 14-cü dəfədir ki, o, belə göstəricilərə nail olur – 20 və ya daha çox xal, 10 və ya daha çox ötürmə və 0 top itkisi. NBA bu statistikanı 1977/78 mövsümündən etibarən qeyd etməyə başlayıb və həmin vaxtdan bəri bu göstəricilərlə ən çox oyun keçirmiş oyunçu artıq Haliburtondur.
Əvvəlki rekord Kris Pola məxsus idi – o, belə performansı 13 dəfə sərgiləmişdi. Haliburton bu göstərici ilə onu bir addım qabaqlayaraq tarixi nəticə əldə etdi.
Qarşılaşma isə “Indiana Pacers”in 119:105 hesablı qələbəsi ilə başa çatdı. Bu qələbə komandaya əlavə motivasiya bəxş etsə də, Haliburtonun statistikası gecənin əsas hadisəsi oldu.
