Konqo Respublikasının paytaxtı Brazzavil şəhərində keçirilən Challenger seriyasına aid tennis turniri zamanı Rusiya tennisçisi İvan Denisov və Niderland təmsilçisi Quy Den Ouden arasındakı oyun atəş səsləri səbəbindən müvəqqəti dayandırılıb.
Məlumata görə, naməlum şəxslər kortun yaxınlığında atəş açıb və ardınca dumantutucu bombalar istifadə ediblər. Hadisənin səbəbləri və hər hansı xəsarət alanın olub-olmaması barədə hələlik məlumat yoxdur. Atəş səsləri eşidildikdən sonra tennisçilər, hakimlər və turnir heyəti kortu tərk edib.
Matç bərpa olundu və başa çatdı
Hadisədən sonra oyuna davam edilib və İvan Denisov iki setdə 1:6, 3:6 hesabı ilə məğlub olaraq 1/8 finala çıxmaq şansını itirib.
Denisov 24 yaşındadır və hazırda ATP reytinqində 1119-cu yerdə qərarlaşıb. Onun rəqibi, 22 yaşlı Quy Den Ouden isə 341-ci sırada yer alır.
