Rusiyalı fiqurlu konkisürən Veronika Jilina karyerasını Azərbaycan millisində davam etdirəcək. Sport-Az xəbər verir ki, bu barədə TASS-a məlumat verən mənbə idmançının gələn mövsümdən etibarən Azərbaycanın bayrağı altında yarışacağını bildirib. “Veronika Jilina növbəti mövsümdən Azərbaycan yığmasına keçəcək”, – deyə mənbə qeyd edib.
Cəmi 17 yaşı olan Jilina tanınmış olimpiya çempionu Yevgeni Pluşenkonun yetirməsidir. O, ötən mövsümdə zədə səbəbindən yarışlarda iştirak edə bilməmişdi. Buna baxmayaraq, 2023-cü ildə Rusiya yeniyetmələr çempionatının gümüş medalını və elə həmin il keçirilən yeniyetmələr arasında Qran-pri finalının qalibi titulunu qazanıb.
