Formula-1 rəhbərliyi Yaxın Şərqdəki təhlükəsizlik vəziyyətinə görə mövsümün iki mərhələsini təxirə salmağı və ya tamamilə ləğv etməyi nəzərdən keçirir. Məlumatlara görə, söhbət Bəhreyn və Səudiyyə Ərəbistanı Qran-prilərindən gedir.
Məsələ ilə bağlı son qərarın yaxın 48 saat ərzində qəbul ediləcəyi gözlənilir. Qərarı Formula-1-in icraçı direktoru Stefano Domenikali və Beynəlxalq Avtomobil Federasiyasının (FIA) prezidenti Məhəmməd bin Sulayem verməlidir. Əsas səbəb isə yarışlarda iştirak edən komandaların, pilotların və texniki heyətin təhlükəsizliyi ilə bağlı narahatlıqlardır.
Təqvimdə dəyişiklik mümkündür
Mövcud təqvimə əsasən, mövsümün dördüncü mərhələsi olan Bəhreyn Qran-prisi 12 aprel, beşinci mərhələ – Səudiyyə Ərəbistanı Qran-prisi isə 19 aprel tarixində keçirilməlidir. Komandalar isə artıq gələn həftənin ortalarında bolidlərin və avadanlıqların regiona daşınmasına başlamalıdır. Bu səbəbdən təşkilatçıların yekun qərar vermək üçün vaxtı məhduddur.
Bəhreyn yarışın keçirilməsi hüququ üçün Formula-1-ə təxminən 40 milyon funt sterlinq, Ciddədə keçirilən Səudiyyə Ərəbistanı Qran-prisi isə təxminən 60 milyon funt sterlinq ödəyir. Bu səbəbdən Ciddə mərhələsi Qətər Qran-prisi ilə birlikdə çempionatın ən gəlirli yarışlarından biri hesab olunur.
Əgər bu iki mərhələ rəsmi şəkildə ləğv edilsə, 2026 mövsümünün təqvimində bir aydan çox fasilə yaranacaq. Mövsümün üçüncü mərhələsi Yaponiyada 29 martda keçiriləcək, bundan sonra isə növbəti yarış yalnız 3 mayda Mayami Qran-prisi olacaq.
