Azərbaycanın paytaxtını təmsil edən və gənc oyunçulardan ibarət “Bakı” həndbol komandası yeni baş məşqçi ilə fəaliyyətə başlayır. Komandanın rəhbərliyi Çingiz Əzimovun üzərinə həvalə olunub.
Əlcəzairdə həm kişi, həm də qadın millilərinin baş məşqçisi kimi təcrübəsi olan Çingiz Əzimov Azərbaycanda da bir sıra şöhrətli klublarda çalışıb. O, müxtəlif dönəmlərdə qadın həndbol komandalarından ibarət olan ABU, “Qarabağ”, “Azəryol” və “İdman Akademiyası” kimi kollektivlərin, eyni zamanda milli komandanın baş məşqçi postunu tutub.
Hazırda 15-20 yaş aralığında olan gənc həndbolçulardan ibarət olan “Bakı” komandası üçün Çingiz Əzimovun rəhbərliyi altında yeni dövrün başlanacağı gözlənilir. Komanda gələcəkdə Azərbaycan həndbolunun inkişafında mühüm rol oynamaq niyyətindədir.
