UEFA Konfrans Liqasının II təsnifat mərhələsinin cavab oyununda Xorvatiyanın “Hayduk” klubu ilə qarşılaşacaq “Zirə” səfərə heyətində iki önəmli oyunçu olmadan gedib.
Sport-az.comun Qol.az saytına istinadən yaydığı xəbərə görə, komandanın aparıcı futbolçuları — mərkəz müdafiəçisi Anje Mutsinzi və yarımmüdafiəçi Brahim Konate Splitdə keçiriləcək oyunda iştirak etməyəcəklər.
Məlumata əsasən:
- Anje Mutsinzi viza ala bilmədiyi üçün sənəd problemi səbəbilə Xorvatiyaya yollana bilməyib. Klubun mətbuat xidmətinin rəhbəri Elmar Abdullazadə məsələni təsdiqləyib.
- Brahim Konate isə “Hayduk”la Bakıda baş tutan ilk oyunda aldığı zədəyə görə heyətə daxil edilməyib. Onun sağlamlıq durumu cavab qarşılaşmasında meydana çıxmasına imkan vermir.
Xatırladaq ki, komandalar arasında Bakıda keçirilmiş ilk oyun 1:1 hesabı ilə başa çatıb. Cavab görüşü iyulun 31-də Split şəhərində keçiriləcək və Bakı vaxtı ilə saat 23:00-da başlayacaq.
