İspaniya futbolunda yay transfer dönəmi yaxınlaşdıqca sensasion iddialar artır. “Barselona”nın əsas müdafiəçilərindən biri olan Jül Kundenin adı bu dəfə əzəli rəqib “Real Madrid” lə hallanır. Madrid təmsilçisinin fransalı futbolçunun vəziyyətini yaxından izlədiyi və mümkün keçid üçün zəmin araşdırdığı bildirilir.
Hazırda Kataloniya klubu oyunçunu satmaq niyyətində olmadığını göstərsə də, rəhbərliyin 80 milyon avro civarında təklif qarşılığında mövqeyini dəyişə biləcəyi qeyd olunur. Bu məbləğ həm klubun maliyyə balansına müsbət təsir göstərə, həm də transfer bazarında yeni imkanlar yarada bilər.
Kunde 2022-ci ildə “Barselona”ya transfer olunub və klubla müqaviləsi 2030-cu ilin yayına qədər qüvvədədir. Cari mövsümdə o, bütün turnirlərdə 36 oyunda forma geyinib, 3 qol və 2 məhsuldar ötürmə ilə yadda qalıb. Onun həm mərkəz müdafiəçisi, həm də sağ cinahda çıxış etməsi transfer bazarında dəyərini artıran əsas amillərdəndir.
Madrid klubunun yay planlarında müdafiə xəttinin gücləndirilməsi prioritet hesab olunur. Əgər “Real” rəsmi addım atarsa, bu keçid İspaniya futbolunda son illərin ən səs-küylü transferlərindən birinə çevrilə bilər.
