Boks XIX əsrdən etibarən dünya miqyasında sürətlə populyarlaşdı və bu inkişafla birlikdə müxtəlif çəki dərəcələri formalaşdı. Ağır çəki divizionu hər zaman xüsusi maraq doğurub.
Uzun illər bu kateqoriyada limit tətbiq edilmirdi, daha sonra isə çəki bölgüsü daha dəqiq müəyyənləşdirildi. Bu gün də ağır çəki boksun ən nüfuzlu və ən çox izlənilən kateqoriyalarından biri sayılır. Adətən ağır çəki çempionlarının ən parlaq dövrü 20-li yaşlara təsadüf edir.
Güc, sürət, hərəkətlilik və bərpa imkanları həmin illərdə daha yüksək olur. Buna baxmayaraq, boks tarixində elə məşhur çempionlar var ki, onlar 30 yaşın sonlarında, hətta 40 yaşdan sonra da dünya titulu qazanıblar. Aşağıda ağır çəkidə tarixə düşən ən yaşlı 5 çempion təqdim olunur.
5. Lennoks Lyuis
Son çempionluq günündə yaşı: 38 yaş, 5 ay, 4 gün
Çempion olduğu dövr: 5 sentyabr 2002 – 6 fevral 2004
Çempionluq müddəti: 885 gün
Tanınma: WBC
Lennoks Lyuis karyerası ərzində üç dəfə dünya çempionu olub və bu göstərici ilə Məhəmməd Əli ilə eyni sırada yer alır. O, WBC, IBF və WBA versiyalarında titul sahibi kimi tanınıb.
Karyerasında 44 döyüşdən 41-də qalib gəlib, üstəlik 1988-ci il Olimpiya Oyunlarının qızıl medalını da qazanıb. Lyuis ağır çəkidə son mütləq dünya çempionu kimi də tarixə düşüb. O, əsas boks təşkilatlarının dörd böyük titulunu bir arada saxlayan son boksçu hesab olunur.
1994-cü ildə Oliver Makkol tərəfindən nokauta salındıqdan sonra bir müddət fasilə verib, daha sonra geri dönərək yenidən zirvəyə qalxıb. Bu gün o, boks şərhçisi kimi fəaliyyət göstərir.
4. Cersi Co Uolkott
Son çempionluq günündə yaşı: 38 yaş, 7 ay, 23 gün
Çempion olduğu dövr: 18 iyul 1951 – 23 sentyabr 1952
Çempionluq müddəti: 433 gün
Tanınma: NBA, NYSAC
Əsl adı Arnold Raymond Cream olan Cersi Co Uolkott 1951–1952-ci illərdə NYSAC və NBA versiyaları üzrə ağır çəki çempionu olub. O, 70 döyüşün 49-da qələbə qazanıb və uzun illər ən yaşlı ağır çəki çempionu kimi rekord saxlayıb.
Bu rekord yalnız 1994-cü ildə yenilənib. Karyerasını 1953-cü ildə başa vurduqdan sonra televiziya və aktyorluq sahəsində də fəaliyyət göstərib. Daha sonra 1971-ci ildə Nyu-Cersidə Camden dairəsinin ilk afroamerikalı şerifi seçilib.
Həmçinin 1975–1984-cü illərdə Nyu-Cersi Ştat Atletika Komissiyasına rəhbərlik edib.
3. Vladimir Kliçko
Son çempionluq günündə yaşı: 39 yaş, 8 ay, 3 gün
Çempion olduğu dövr: 22 aprel 2006 – 28 noyabr 2015
Çempionluq müddəti: 3507 gün
Tanınma: WBA, WBO, IBF
Vladimir Kliçko 1996–2017-ci illərdə peşəkar boksda çıxış edib və iki dəfə ağır çəkidə dünya çempionu olub.
Onun ikinci çempionluq dövrü xüsusilə uzun çəkib və 2006-cı ildən 2015-ci ilə qədər davam edib. Karyerasında 69 döyüşdən 64-də qalib gəlib. Kliçko bütün əsas titulları qazanıb və öz dövrünün ən güclü ağır çəkilərindən biri hesab olunur.
O, yüksək texnikası, ayaq işi və hərəkətliliyi ilə seçilirdi. 1996-cı il Olimpiadasında və 1995-ci il Hərbi Dünya Çempionatında qızıl medal qazanıb. 2021-ci ildə Boks Şöhrət Zalına daxil edilib.
2. Vitali Kliçko
Son çempionluq günündə yaşı: 42 yaş, 2 ay, 26 gün
Çempion olduğu dövr: 11 oktyabr 2008 – 16 dekabr 2013
Çempionluq müddəti: 1892 gün
Tanınma: WBC
Vitali Kliçko da qardaşı kimi üç dəfə ağır çəki çempionu olub. Onun üçüncü çempionluq dövrü 2008-ci ildən 2013-cü ilə qədər davam edib. 47 döyüşdən 45-də qalib gələn Vitali ağır çəkidə ən dominant döyüşçülərdən biri sayılır.
O, 1999-cu ildə WBO, 2004-cü ildə isə ilk WBC titulunu qazanmışdı. Qardaşı Vladimirin ümumi çempionluq dövrü 12 ilə yaxın davam edib, Vitalinin isə ümumi hökmranlığı 7 il 5 ay olub. O, qardaşından daha sərt və aqressiv döyüşçü kimi tanınırdı. Nokaut faizi 87 faiz idi ki, bu da onun gücünü açıq şəkildə göstərirdi.
1. Corc Forman
Son çempionluq günündə yaşı: 46 yaş, 5 ay, 18 gün
Çempion olduğu dövr: 5 noyabr 1994 – 29 iyun 1995
Çempionluq müddəti: 237 gün
Tanınma: WBA, IBF
Ağır çəki tarixinin ən yaşlı dünya çempionu Corc Formandır. O, 1994-cü ildə ikinci böyük titulunu qazananda artıq 46 yaşında idi. Forman 81 döyüşün 76-da qələbə qazanıb və 1968-ci il Olimpiadasının qızıl medalçısı olub.
İlk böyük titullarını 1973-cü ildə, cəmi 24 yaşında qazanmışdı. 1977-ci ildə Cimmi Yanqa uduzduqdan sonra 10 illik fasilə vermiş, daha sonra geri dönərək yenidən dünya çempionu olmuşdu. Onun geri dönüşü boks tarixinin ən böyük hekayələrindən biri sayılır.
