Azərbaycanın gənc boksçulardan ibarət milli komandası dünya çempionatında tarixi bir uğura imza atıb.
Sport-az.com xəbər verir ki, Monteneqronun Budva şəhərində keçirilən dünya çempionatında baş məşqçi Elbrus Rzayevin rəhbərliyi altında çıxış edən milli komandamızın 5 boksçusu yarımfinala vəsiqə qazanıb. Bilalhəbaşi Nəzərov (48 kq), Zidan Hümbətov (51 kq), Məhəmmədəli Qasımzadə (60 kq), Əli Abdullayev (63,5 kq) və Aynur Mikayılova (57 kq) 1/4 final mərhələsində qələbə qazanaraq yarımfinala adlayıblar. Bu nəticə ilə komanda artıq 5 medal təmin edib.
Bu uğur Azərbaycan boks tarixində yeni rekord hesab olunur. Azərbaycan millisi indiyədək gənclər arasında dünya çempionatında bu qədər medal əldə etməmişdi. Əvvəlki rekord isə 2004-cü ildə qeydə alınmışdı, həmin vaxt 4 boksçumuz yarımfinala yüksələrək, Cənubi Koreyanın Jeju şəhərində keçirilən yarışda 4 bürünc medal qazanmışdı.
Bundan əlavə, Aynur Mikayılova dünya çempionatında medal qazanan ilk azərbaycanlı qadın boksçu olacaq. Bu uğura qədər heç bir qadın idmançımız dünya çempionatında medal qazana bilməmişdi.
