“Barselona” 2025/2026 mövsümündə La Liqa çempionluğunu vaxtından əvvəl rəsmiləşdirib. Kataloniya təmsilçisi XXXV turda əsas rəqibi “Real Madrid”i məğlub edərək qızıl medalları təmin edib.
“Kamp Nou” stadionunda keçirilən prinsipial qarşılaşma meydan sahiblərinin 2:0 hesablı qələbəsi ilə başa çatıb. “Barselona” oyunun ilk hissəsində vurduğu qollarla matçın taleyini həll edib.
Hans-Diter Flikin komandası görüşə olduqca fəal başlayıb. Hesab 9-cu dəqiqədə açılıb. Markus Reşford cərimə meydançasında yaranan fürsəti düzgün dəyərləndirərək topu qapıdan keçirib. Cəmi doqquz dəqiqə sonra Ferran Torres fərqi artıraraq “Barselona”nı rahat vəziyyətə gətirib.
“Real Madrid” ikinci hissədə təşəbbüsü ələ almağa çalışsa da, Madrid klubunun hücumları nəticə verməyib. Müdafiədə etibarlı təsir bağışlayan kataloniyalılar vacib qələbəni qoruyaraq mövsümün çempionu olub.
Bu nəticədən sonra “Barselona” xalını 91-ə çatdırıb və sona üç tur qalmış ən yaxın izləyicisi “Real Madrid”i 14 xal qabaqlayıb. Beləliklə, Kataloniya klubu tarixində 29-cu dəfə İspaniya çempionu adına sahib çıxıb.
İspaniya mediasında yayılan məlumatlara əsasən, qarşılaşma başlamazdan əvvəl “Barselona”nın baş məşqçisi Hans-Diter Flikin atasının xatirəsi bir dəqiqəlik sükutla yad edilib. Bildirilir ki, məşqçinin atası matçdan bir gün əvvəl vəfat edib.
Cari mövsüm “Barselona” həm hücum futbolu, həm də sabit nəticələri ilə diqqət çəkib. Komanda xüsusilə ev oyunlarında yüksək məhsuldarlıq nümayiş etdirərək çempionluğa layiq olduğunu təsdiqləyib.
La Liqa tarixində ən çox çempionluq qazanan klub isə 36 titulla “Real Madrid” olaraq qalır.
