Uimbldon-2026-da kişilər arasında yarımfinal cütlərindən biri müəyyənləşib. Günün ən dramatik qarşılaşmasında Novak Cokoviç beş setlik marafonda Feliks Oje-Aliassimi məğlub edərək növbəti mərhələyə yüksəlib. Dünya reytinqinin lideri Yannik Sinner isə Yan-Lennard Ştruff üzərində inamlı qələbə qazanaraq serbiyalı tennisçiyə rəqib olub.
Cokoviç beşsetlik trillerdə rekordunu daha da yaxşılaşdırdı
ATP reytinqində 8-ci pillədə qərarlaşan Novak Cokoviç turnirin 1/4 finalında 3 nömrəli seribaşı Feliks Oje-Aliassim (ATP 4) ilə 5 saat 15 dəqiqə davam edən möhtəşəm qarşılaşmadan qalib ayrılıb – 7:6 (12:10), 3:6, 6:3, 6:7 (4:7), 7:6 (10:4).
Bu, tennisçilərin dördüncü qarşılaşması olub və şəxsi görüşlərdə hesab Cokoviçin xeyrinə 3:1-ə yüksəlib.
Serbiyalı ulduz bununla Uimbldonda 107-ci qələbəsini qazanıb. Yeddiqat çempion turnirdə 15-ci yarımfinalına yüksələrək ardıcıl səkkizinci dəfə bu mərhələdə oynamaqla Rocer Federerin rekordunu geridə qoyub. 39 yaş 38 günlüyündə yarımfinala vəsiqə qazanan Cokoviç Ken Rouzvolldan sonra buna nail olan ikinci ən yaşlı tennisçi olub. O, həmçinin Böyük Dəbilqə yarışlarında Açıq Era tarixinin 50-ci beşsetlik matçını keçirərək daha bir rekorda imza atıb.
Uimbldon-2026. Ot örtüyü. 1/4 final
Feliks Oje-Aliassim [3] – Novak Cokoviç [7] – 6:7 (10:12), 6:3, 3:6, 7:6 (7:4), 6:7 (4:10)
Sinner üç setdə qalib gəldi və yarımfinala yüksəldi
ATP reytinqinin lideri Yannik Sinner 1/4 finalda Almaniya təmsilçisi Yan-Lennard Ştruffu (ATP 74) 2 saat 37 dəqiqəyə məğlub edib – 7:5, 7:6 (7:4), 6:3.
Bu, rəqiblər arasında dördüncü duel olub və italiyalı bütün görüşlərdə qalib gəlib. Sinner karyerasında üçüncü dəfə Uimbldonun yarımfinalına yüksəlib. Bundan başqa, o, dünya bir nömrəsi statusunda ATP turnirlərində qazandığı qələbələrin sayını 95-ə çatdıraraq Stefan Edberqin 94 qələbəlik göstəricisini geridə qoyub.
İndi isə turnirin ən çox gözlənilən görüşlərindən biri baş tutacaq. Cokoviç və Sinner ardıcıl ikinci il Uimbldonun yarımfinalında üz-üzə gələcəklər. Ötən il bu mərhələdə qalib gələn tərəf italiyalı tennisçi olmuşdu.
Uimbldon-2026. Ot örtüyü. 1/4 final
Yannik Sinner [1] – Yan-Lennard Ştruff – 7:5, 7:6 (7:4), 6:3
