İspaniyalı tennisçi Karlos Alkarasın uzun müddətdir davam edən bilək zədəsinin onun psixoloji vəziyyətinə də təsir göstərə biləcəyi bildirilib. 23 yaşlı idmançı apreldən bəri rəsmi matça çıxmayıb və mövsümün bir neçə mühüm turnirini buraxmalı olub.
İtaliya Tennis Federasiyasının tibbi komissiyasının rəhbəri Canni Daniele Alkarasın vəziyyətini şərh edərkən zədənin dəqiq xarakteri ilə bağlı İspaniya mətbuatında kifayət qədər məlumat verilmədiyini bildirib. Onun fikrincə, əvvəlki məşq intensivliyinə qayıtmaqda yaşanan çətinliklər tennisçinin psixoloji durumuna mənfi təsir göstərə bilər.
Mütəxəssis uzunmüddətli fasilənin yeddiqat “Böyük Dəbilqə” çempionunun özünəinamını zəiflədə və korta dönüş prosesini psixoloji baxımdan daha mürəkkəb edə biləcəyini qeyd edib.
Alkaras ABŞ Açıq çempionatına hazırlaşır
Alkaras sağ biləyindən aldığı zədə səbəbindən aprelin ortalarından etibarən yarışlardan kənarda qalıb. Problemlər Barselona turnirində üzə çıxıb və sonrakı tibbi müayinələrdən sonra ispaniyalı Madrid, Roma və “Rolan Qarros” turnirlərində iştirak etməmək qərarına gəlib.
Bərpa prosesi gözləniləndən uzun çəkdiyindən Alkaras daha sonra “Queen’s Club” və Uimbldondan da çəkilib. Tennisçi may ayında açıqlamasında vəziyyətinin yaxşılaşdığını, lakin yarışlara qayıtmağa hələ hazır olmadığını bildirmişdi.
Avqustda gözlənilən dönüş də təxirə salınıb. Dünya reytinqində ikinci pillədə qərarlaşan Alkaras biləyindəki problemin davam etməsi səbəbindən Sinsinnati turnirində iştirakdan imtina edib. O, ötən il bu turnirin qalibi olmuşdu.
Son məlumatlara əsasən, ispaniyalı məşqlərini davam etdirir və əsas hədəfi avqustun 30-da başlayacaq ABŞ Açıq çempionatına hazır olmaqdır. Lakin onun Nyu-Yorkdakı turnirdə iştirak edib-etməyəcəyi hələ rəsmən təsdiqlənməyib.
