Argentina millisindəki karyerasını başa vurmağa hazırlaşan Lionel Messi vida matçı üçün hazırlanmış xüsusi formanı nümayiş etdirib. 39 yaşlı hücumçu oktyabrın 6-da Buenos-Ayresdəki “Monumental” stadionunda Benin yığmasına qarşı keçirəcəyi görüşdə son dəfə Argentina millisinin formasını geyinəcək. Bu qarşılaşmanın Messinin yığmadakı son oyunu olacağı Argentina Futbol Assosiasiyası tərəfindən də təsdiqlənib.
Messi xüsusi formanı sosial şəbəkədə yayımladığı video vasitəsilə təqdim edib. Görüntülərdə futbolçu butslarını kənara qoyur və əvvəlki formanı vida matçı üçün hazırlanmış yeni forma ilə əvəz edir. O, paylaşımına “Sonuncu oyun… Ömürlük forma” sözlərini əlavə edib.
Messinin son formasında xüsusi detallar
Vida oyunu üçün nəzərdə tutulan forma Argentinanın ənənəvi açıq mavi və ağ rənglərini qoruyub. Arxa hissədə “Messi” soyadı və 10 nömrəsi qızılı rəngdə işlənib. Dizaynda Argentina bayrağının əsas simvollarından olan May günəşi də xüsusi yer tutur.
Messi Argentina millisində 2005-ci ildə debüt edib və iki onillikdən artıq yığmanın formasını geyinib. Onun milli komanda ilə ən böyük uğurları arasında 2022-ci il dünya çempionluğu, 2021 və 2024-cü illərdə qazanılan Amerika Kuboku, həmçinin 2022-ci ildəki Finalissima titulu var.
Vida mərasiminin miqyası da geniş olacaq. Argentina Futbol Assosiasiyasının prezidenti Klaudio Tapia 2022-ci ildə dünya çempionu olmuş heyətin bütün üzvlərinin və onların ailələrinin görüşə dəvət edildiyini açıqlayıb.
