Kabo-Verde millisinin qapıçısı Vozinya 2026-cı il dünya çempionatındakı uğurlu çıxışından sonra qazandığı böyük populyarlığın şəxsi həyatını tamamilə dəyişdiyini etiraf edib. Mundialın ən çox müzakirə olunan simalarından birinə çevrilən təcrübəli qolkiper məşhurluğun göründüyü qədər asan olmadığını bildirib.
Dünya çempionatında göstərdiyi parlaq oyun sayəsində Vozinyanın sosial şəbəkələrdə izləyici sayı qısa müddətdə milyonlarla artıb. Onun çıxışı futbol azarkeşlərinin diqqətini cəlb edib və karyerasında yeni mərhələnin başlanğıcı olub.
“Şəxsi həyatım demək olar ki, qalmayıb”
“The Observer” nəşrinə danışan qapıçı məşhurluğun gündəlik həyatına ciddi təsir etdiyini deyib:
“Hüzurumu və rahatlığımı itirmişəm. Artıq şəxsi həyatım demək olar ki, yoxdur, yaxud əvvəlkindən xeyli azdır. İndi küçəyə çıxanda, restorana gedəndə mütləq kimsə mənimlə şəkil çəkdirmək və ya avtoqraf almaq istəyir. Daha pisi isə odur ki, kimsə məni videoya çəkir. Həyatımda ən çox dəyişən məhz budur və düşünmürəm ki, bununla bağlı nəsə edə bilərəm”.
Təcrübəli qolkiper insanların məşhurluğun yalnız görünən tərəfini gördüyünü də vurğulayıb.
“Bir çox insan məşhur olmaq və ictimai şəxs statusu qazanmaq istəyir. Amma onlar bunun yalnız müsbət tərəfini görürlər. Açığı, mənə indiki həyatımla əvvəlki həyatım arasında seçim etmək imkanı versəydilər, əvvəlki həyatımı seçərdim”.
2026-cı il dünya çempionatında Vozinya Kabo-Verde millisinin heyətində 4 oyunda meydana çıxıb, 2 matçda qapısını toxunulmaz saxlayıb. Turnirdəki uğurlu çıxışından sonra onun transfer dəyərinin əhəmiyyətli dərəcədə artdığı, sosial şəbəkələrdə isə milyonlarla yeni izləyici qazandığı bildirilir.
