Futbol üzrə Azərbaycan Kubokunun ikinci təsnifat mərhələsi iki maraqlı nəticə ilə başlayıb. Oktyabrın 27-də keçirilən ilk qarşılaşmalarda “Araz-Naxçıvan” rəqibini böyük hesabla məğlub edib, “Marafon” isə daha yüksək liqada çıxış edən komandanı mübarizədən kənarlaşdırıb.
Bir oyundan ibarət olan mərhələdə qalib gələn hər iki klub növbəti raunda vəsiqəni təmin edib. Bu mərhələdən etibarən Premyer Liqa komandaları da ölkə kubokunda mübarizəyə qoşulublar.
“Araz-Naxçıvan” altı qolla qalib gəldi, “Marafon” sürpriz etdi
Şamaxı şəhər stadionunda keçirilən görüşdə “Araz-Naxçıvan” “Şimal”ı 6:0 hesabı ilə məğlub edib.
Matçın ən məhsuldar futbolçusu Ağadadaş Salyanski olub. O, 11, 87 və 90-cı dəqiqələrdə fərqlənərək het-trikə imza atıb. Komandanın digər qollarını Rövlan Muradov (51), Abdulla Rzayev (52) və Ülvi İsgəndərov (70) vurublar.
Günün digər qarşılaşmasında İkinci Liqa təmsilçisi “Marafon” Birinci Liqada mübarizə aparan “Zaqatala”ya qalib gəlib.
Sabirabaddakı “Marafon Arena”da baş tutan oyunun taleyini İlham Allahverdiyevin 59-cu dəqiqədə vurduğu qol həll edib. 1:0 hesablı qələbə “Marafon”u növbəti mərhələyə yüksəldib.
Azərbaycan Kubokunda günün digər oyunları
Oktyabrın 27-də ikinci təsnifat mərhələsi çərçivəsində daha üç qarşılaşma nəzərdə tutulub.
17:00 – “Kür-Araz” – “Sumqayıt”
- Stadion: “SOCAR Polymer Arena”
- Hakimlər: Niyaz Əhmədov, Rəhman Aslanov, Məmmədəli Kərimov, Nəriman Ağayev
- Hakim-inspektor: Babək Quliyev
- AFFA nümayəndəsi: Zümrüd Ağayeva
17:00 – “Qəbələ” – “Mingəçevir”
- Stadion: Qəbələ şəhər stadionu
- Hakimlər: Nazim Abdullayev, Taleh Məmmədov, Rasim Axundov, Mehdi Yusifov
- Hakim-inspektor: Feyzulla Feyzullayev
- AFFA nümayəndəsi: Eldar Məmmədov
18:00 – “Səbail” – “Zirə”
- Stadion: “Bank Respublika Arena”
- Hakimlər: Səbuhi Bayramov, Aydın Baxşıyev, Mirnihad Seyidov, Vaqif Vəliyev
- Hakim-inspektor: Ceyhun Haşımov
- AFFA nümayəndəsi: Anar Şıxəliyev
İkinci təsnifat mərhələsinin oyunlarına oktyabrın 29-da yekun vurulacaq. Bütün qarşılaşmaların qalibləri Azərbaycan Kubokunda növbəti raundda mübarizəni davam etdirəcəklər.
