Azərbaycan Atletika Federasiyasının “Hamı üçün qaçış” komitəsinin sədr müavini Elşən Quliyev bəyan edib ki, Xankəndi ultramarafonu hər il təşkil olunacaq. Bu təşəbbüsün məqsədi Azərbaycanın tarixi qələbələrini dünyaya çatdırmaq və bu uğurları idman vasitəsilə əbədiləşdirməkdir.
Sport-az xəbər verir ki, 10-13 aprel tarixlərində keçiriləcək Qəbələ–Xankəndi ultramarafonuna hazırlıq işləri artıq yekunlaşmaq üzrədir. Qeyd edək ki, bu marafon ikinci dəfə baş tutur. Ötən il iştirakçılar Xankəndidən Bakıya qədər 380 km məsafə qət etmişdilər. Bu dəfə isə Qəbələdən Xankəndiyə doğru 192 km-lik marşrut seçilib.
Elşən Quliyev bildirib ki, yarışda Türkiyə, Rusiya, Moldova və Gürcüstandan da idmançılar iştirak edəcək:
“Bu il ultramarafona 86 iştirakçı qeydiyyatdan keçib. Təəssüf ki, onlardan biri zədə səbəbilə yarışa qoşula bilməyəcək. Qalan idmançılar həm fiziki, həm də mənəvi cəhətdən hazırdırlar.”
Ultramarafonun mərhələləri:
- Qəbələ – Ağdaş (55 km)
- Ağdaş – Bərdə (65 km)
- Bərdə – Ağdam (44 km)
- Ağdam – Xankəndi (28 km)
Hər mərhələnin qalibləri ayrı-ayrılıqda mükafatlandırılacaq. Ümumi nəticəyə görə qalib gələnlər isə ultramarafonun əsas mükafatına layiq görüləcək.
Bu təşəbbüs, Azərbaycanın işğaldan azad olunmuş ərazilərində beynəlxalq idman tədbirlərinin keçirilməsi baxımından xüsusi əhəmiyyət daşıyır və dünya idman ictimaiyyətinin diqqətini Qarabağa yönəltmək məqsədi daşıyır.
