Slovakiyanın paytaxtı Bratislavada keçirilən Avropa güləş çempionatında bu gün yunan-Roma üslubunda beş azərbaycanlı güləşçi xalça üzərinə çıxıb. Yarışda komandamız üçün uğurlu nəticələr qeydə alınıb.
Yarımfinala yüksələnlər
- Eldəniz Əzizli (55 kq) – İkiqat Avropa çempionu olan təcrübəli idmançımız Gürcüstanlı Vaxtanq Loluya üzərində inamlı qələbə (9:0) qazanaraq yarımfinala adlayıb.
- Murad Məmmədov (63 kq) – O da möhtəşəm çıxış etdi: əvvəlcə UWW təmsilçisi Gleb Makarenkonu 6:1, daha sonra xorvat İvan Lizatoviçi 9:0 hesabı ilə məğlub edərək yarımfinala yüksəlib. Muradın növbəti rəqibi türkiyəli Kərəm Kamal olacaq.
- İslam Abbasov (87 kq) – İslam üç ardıcıl qələbə ilə yarımfinala vəsiqə qazanıb:
- Şimon Şimonoviç (Polşa) – 4:0
- Marsel Sterkenburq (Niderland) – 4:1
- Eksus Mukubuya (Norveç) – 3:1
Yarımfinala çata bilməyənlər
- Beka Kandelaki (130 kq) – Ukraynalı Mixal Vişneveçkiyə qarşı döyüşü 7:1 hesablı erkən qələbə ilə başa vursa da, növbəti mərhələdə Türkiyədən Məhəmməd Hamzə Bakıra 0:2 hesabı ilə uduzub.
- Sənan Süleymanov (77 kq) – Avropa çempionumuz bu dəfə uğur əldə edə bilmədi. O, türkiyəli rəqibi Əhməd Yılmaza 1:2 hesabı ilə məğlub olaraq turniri erkən tərk etdi.
