Azərbaycan cüdo millisinin üzvləri 23–27 aprel tarixlərində Monteneqronun paytaxtı Podqoritsada keçiriləcək Avropa çempionatında mübarizəyə başlayacaq. Yarış öncəsi keçirilən püşkatmada komandamızın startdakı rəqibləri müəyyənləşib.
Kişilər kateqoriyası:
- 60 kq: Əhməd Yusifov israilli İtzhak Aşpiz ilə üz-üzə gələcək. Turan Bayramov isə mübarizəyə maltalı Ceyms Zaxra ilə qarşılaşaraq başlayacaq.
- 66 kq: Ruslan Paşayevin ilk rəqibi bolqarıstanlı Boyan Yotov olacaq.
- 73 kq: Rəşid Məmmədəliyev britaniyalı Benyamin Levi ilə görüşəcək.
- 81 kq: Zelim Tskaev İsveçrə təmsilçisi Aurelien Bonferroni ilə qarşılaşacaq. Digər təmsilçimiz Ömər Rəcəbli ilk mərhələni buraxacaq.
- 90 kq: Murad Fətəyev beynəlxalq cüdo federasiyasını (IJF) təmsil edən Aleksandr Sidoryuk ilə qarşılaşacaq.
- 100 kq: Zelim Kotsoyev ilk qarşılaşmasını mübarizədən kənarda qalmaqla başlayacaq.
- +100 kq: Uşangi Kokauri polşalı Patrik Bronyets ilə qüvvəsini sınayacaq.
Qadınlar kateqoriyası:
- 48 kq: Kənül Əliyeva Polşa idmançısı Paulina Şlakta ilə tatami bölüşəcək.
- 52 kq: Gültac Məmmədəliyevanın ilk sınağı Almaniyadan Kjara Serra ilə olacaq.
- 57 kq: Fidan Əlizadənin rəqibi latviyalı Anastasiya Sokiryanska olacaq.
- 70 kq: Günel Həsənli Ukrayna təmsilçisi Anna Oliniyk-Korniyko ilə döyüşəcək, Sudaba Ağayeva isə israilli Adelina Novitski ilə qarşılaşacaq.
- +78 kq: Nigar Süleymanova Gürcüstanlı Sofio Somxişvili ilə gücünü yoxlayacaq.
Azərbaycan cüdoçularını qitə çempionatında çətin və gərgin qarşılaşmalar gözləyir. Hədəf — mümkün qədər çox medal qazanmaq və ölkənin idman şərəfini layiqincə qorumaqdır.
