Azərbaycan təmsilçiləri “Mingəçevir Reqatası-2026” beynəlxalq turnirinin üçüncü və son yarış günündə daha 11 medal qazanıblar. Mingəçevir “Kür” Olimpiya Tədris-İdman Mərkəzində keçirilən final yürüşlərində idmançılarımız 3 qızıl, 3 gümüş və 5 bürünc medala sahib çıxıblar.
Bununla da Azərbaycan avarçəkənlərinin üç yarış günü ərzində qazandıqları medalların ümumi sayı 22-yə çatıb. İlk iki gündə təmsilçilərimiz 11 medal əldə etmişdilər.
Son gündə medal qazanan Azərbaycan idmançıları
- Kayak, 500 m, 1 nəfərlik (2008-2009): Əlimurad Hacızadə — qızıl, Qiyas Əhmədov — gümüş, Tengiz Qaqnidze — bürünc
- Kanoe, 500 m, 1 nəfərlik (2008-2009): Hüseyn Səmədli — bürünc
- Kayak, 200 m, 2 nəfərlik (2008-2009): Qiyas Əhmədov – Tengiz Qaqnidze — qızıl, Sabir Ağayev – Mikayıl Vəliyev — bürünc
- Kayak, 200 m, 2 nəfərlik (2010-2011): Nizami Kərimov – Maqsud Mantaşev — bürünc
- Kayak, 500 m, 1 nəfərlik (2010-2011): Mustafa Vəlizadə — qızıl
- Kayak, 500 m, 2 nəfərlik (2010-2011): Elmir Tarverdiyev – Mustafa Vəlizadə — gümüş
- Akademik avarçəkmə, 1500 m, 2 nəfərlik (2008-2009): Azər İlyasov – İsabala Dadaşzadə — gümüş, Tunar Məmmədzadə – İsmayıl Şirinov — bürünc
Beləliklə, Azərbaycan komandası turnirin son günündə kayak, kanoe və akademik avarçəkmə növlərinin hamısında medal əldə edib.
“Mingəçevir Reqatası-2026”ya sentyabrın 29-da Füzulidəki Köndələn su anbarında start verilmişdi. İlk yarış günündə Azərbaycan idmançıları 4 medal, ikinci gündə isə Mingəçevirdə 7 medal qazanaraq final gününə ümumilikdə 11 mükafatla çıxmışdılar.
Beynəlxalq turnir Gənclər və İdman Nazirliyi ilə Azərbaycan Su İdmanı Federasiyasının birgə təşkilatçılığı ilə keçirilib. Yarışlarda Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox gənc avarçəkən mübarizə aparıb.
