Azərbaycan avqustun sonunda ilk dəfə çimərlik güləşi üzrə U-17 dünya çempionatını qəbul edəcək. Beynəlxalq yarış 27-29 avqust tarixlərində Bakıda, Sea Breeze istirahət mərkəzində təşkil olunacaq. Eyni məkanda yeniyetmələrin dünya çempionatı ilə yanaşı, böyüklər arasında Dünya Seriyasının IV mərhələsi də keçiriləcək. Turnirlər Birləşmiş Dünya Güləşi (UWW) təqvimində yer alır və dünyanın müxtəlif ölkələrindən idmançıları bir araya gətirəcək.
Yeniyetmələr və böyüklər Xəzər sahilində mübarizə aparacaq
Avqustun 27-də keçiriləcək U-17 dünya çempionatında 34 ölkədən 150-yə yaxın gənc güləşçi medallar uğrunda yarışacaq.
Oğlanlar:
- 60 kq
- 70 kq
- 80 kq
- 90 kq
Qızlar:
- 45 kq
- 55 kq
- 65 kq
- 75 kq
Avqustun 28-29-da isə böyüklər arasında çimərlik güləşi üzrə Dünya Seriyasının IV mərhələsi keçiriləcək. Yarışda 60-dan çox idmançının iştirakı gözlənilir.
Kişilər:
- 70 kq
- 80 kq
- 90 kq
- +90 kq
Qadınlar:
- 50 kq
- 60 kq
- 70 kq
- +70 kq
UWW-nin yarış təqviminə əsasən, Bakı mərhələsi Dünya Seriyasının vacib dayanacaqlarından biri hesab olunur.
Təşkilatçıların məlumatına görə, hər iki yarışda ümumilikdə 34 ölkədən 200-dən artıq idmançı iştirak edəcək. Xəzər dənizi sahilində keçiriləcək turnir Azərbaycanın ilk dəfə U-17 çimərlik güləşi üzrə dünya çempionatına ev sahibliyi etməsi ilə tarixə düşəcək.
Beynəlxalq yarışın ölkəmizdə təşkili Azərbaycanın son illərdə iri güləş turnirlərini uğurla qəbul etməsinin davamı hesab olunur və ölkənin bu idman növündə beynəlxalq nüfuzunun daha da möhkəmlənməsinə töhfə verəcək.
