Polşanın Katovitse şəhərində keçirilən şəxsi Avropa çempionatında Azərbaycan şahmatçıları uğurlu çıxışlarını davam etdirirlər. Qrossmeysterlər Aydın Süleymanlı və Nicat Abasov ardıcıl qələbələrlə turnirin liderlər qrupunda möhkəmləniblər.
Hər iki şahmatçı üçüncü turda da qalib gələrək maksimum nəticə – 3 xal toplayıblar. Əlavə göstəricilərə əsasən, onlar müvafiq olaraq 7-ci və 10-cu pillələrdə qərarlaşıblar ki, bu da yüksək rəqabət fonunda kifayət qədər uğurlu göstərici hesab olunur.
Üçüncü tur və növbəti rəqiblər
Üçüncü turda Aydın Süleymanlı həmyerlisi Riad Səmədov üzərində qələbə qazanaraq seriyasını davam etdirib. Növbəti mərhələdə o, türkiyəli Işık Can ilə qarşılaşacaq.
Nicat Abasov isə ukraynalı Svyatoslav Bazakutsanı məğlub edib. O, qarşıdakı turda digər ukraynalı şahmatçı Roman Dekhtyarov ilə gücünü sınayacaq.
2,5 xal toplayan izləyicilər sırasında isə Xəzər Babazadə, Məhəmməd Muradlı, Gövhər Beydullayeva və Şiroğlan Talıbov yer alıblar.
Turnirdə iştirak edən yeganə qadın təmsilçimiz Gövhər Beydullayeva da diqqət çəkən nəticə ilə yadda qalıb. O, reytinqi özündən təxminən 200 xal yüksək olan ingiltərəli Şeys Royal üzərində qələbə qazanaraq sürprizə imza atıb.
Qeyd edək ki, Avropa çempionatı 11 turdan ibarətdir və yekun nəticələrə əsasən ilk 20 şahmatçı 2027-ci ildə keçiriləcək Dünya Kubokuna vəsiqə əldə edəcək.
