Azərbaycan gənc cüdoçular arasında Avropa Kubokuna üçüncü dəfə ev sahibliyi edəcək. Sport-Az xəbər verir ki, Avropa Cüdo İttifaqının (EJU) rəsmi təqviminə daxil edilən turnir 3-4 may tarixlərində Quba Olimpiya İdman Kompleksində keçiriləcək.
Azərbaycan Cüdo Federasiyasının icraçı vitse-prezidenti Rəşad Rəsullu bildirib ki, ölkəmiz beynəlxalq cüdo turnirlərinin təşkilində böyük təcrübəyə malikdir.
“Artıq ənənəvi hal alan Avropa Kuboku bu dəfə fərqli bir regionda – Qubada baş tutacaq. Daha əvvəl bu yarış iki dəfə Göygöldə keçirilmişdi. Turnirin əsas məqsədi yalnız gənc cüdoçularımızın beynəlxalq yarış təcrübəsini artırmaq deyil, həm də cüdonun ölkəmizin müxtəlif bölgələrində populyarlaşmasına töhfə verməkdir”, – deyə o vurğulayıb.
Turnirin ardından, 5-7 may tarixlərində Qubada gənc cüdoçular üçün beynəlxalq təlim-məşq toplanışı təşkil olunacaq.
