Azərbaycan paraüzgüçüsü Raman Saley (S12 kateqoriyası) Sinqapurda təşkil olunan dünya çempionatında parlaq qələbə əldə edib. Belarus əsilli idmançı, 2024-cü il Paris Paralimpiya Oyunlarında gümüş və bürünc medallar qazandıqdan sonra bu dəfə də uğurunu davam etdirib.
Yarışın açılış günündə 100 metr arxası üstə üzmə növündə çıxış edən Saley, güclü rəqiblər arasında üstünlüyünü sübut edib. O, finiş xəttini 1:01.58 saniyədə keçərək qızıl medalın sahibi olub və dünya çempionu adını qazanıb. Bu nailiyyət Saleyin karyerasında növbəti mərhələdir – o, əvvəllər 2020-ci il Tokio Paralimpiadasında üç qızıl medal əldə etmiş və Azərbaycan idman tarixində unikal rekordlar qoymuşdu.
