“Barselona” yay transfer pəncərəsinin əsas hədəflərindən biri hesab olunan “Atletiko”nun hücumçusu Xulian Alvaresi heyətinə qatmaq niyyətindən əl çəkməyib. Kataloniya təmsilçisi 2026-cı il dünya çempionatı başa çatdıqdan sonra Madrid klubuna yeni rəsmi təklif göndərməyə hazırlaşır. Klub rəhbərliyi argentinalı futbolçunun gələcəyi ilə bağlı son açıqlamalarını da transfer prosesində mühüm amil hesab edir.
Məlumata görə, “Barselona” rəhbərliyi Xulian Alvaresin “Atletiko”dan ayrılmaq istəyi ilə bağlı verdiyi açıqlamaları müsbət qarşılayıb və danışıqları dünya çempionatından dərhal sonra yenidən aktivləşdirməyi planlaşdırır.
İspaniya mətbuatının yazdığına əsasən, Kataloniya klubu Madrid təmsilçisinə təxminən 130 milyon avro dəyərində yeni təklif təqdim etməyə hazırdır. Klub daxilində bu transferi maliyyələşdirmək imkanının olduğu bildirilir.
Bununla belə, son həftələr “Barselona” ilə “Atletiko” arasında münasibətlərin gərgin olduğu etiraf edilir. Buna baxmayaraq, rəhbərlik yaxın vaxtlarda konkret danışıqların başlanacağına inanır.
26 yaşlı forvard ötən mövsüm bütün turnirlərdə 49 oyunda meydana çıxaraq 20 qol vurub və 9 məhsuldar ötürmə ilə yadda qalıb. Onun çıxışı Avropanın aparıcı klublarının diqqətini cəlb edib və “Barselona” hazırda futbolçunun əsas namizədlərindən biri hesab olunur.
