2 mart gecəsi Nyu-Yorkda peşəkar boks gecəsi baş tutdu. Sport-Az-ın championat-a istinadən verdiyi məlumata görə, gecənin əsas döyüşü WBA-nın hazırkı yüngül çəki üzrə çempionu Gervonta Devis ilə Lamont Roç arasında baş tutan titul qarşılaşması oldu.
Devis 2024-cü ildə cəmi bir döyüş keçirmişdi. İyun ayında o, məğlubedilməz Frenk Martin ilə qarşılaşdı. Döyüşün əvvəlində çətinlik çəksə də, ortalara doğru üstünlüyü ələ aldı və səkkizinci raundda rəqibini nokauta saldı. Mükəmməl 30-0 rekordu və təsirli nokautlarına baxmayaraq, Devis tez-tez rəqiblərinin səviyyəsinə görə tənqid olunur. Roçla döyüşdən əvvəl də boks ictimaiyyəti onu öz çəki dərəcəsindəki digər çempionlardan qaçmaqda və daha zəif rəqiblərlə qarşılaşmaqda ittiham edirdi.
Roç da WBA çempionudur, lakin ikinci yarım yüngül çəkidə titul sahibidir. 2022-ci ildən bəri ildə cəmi bir dəfə döyüş keçirir. 2023-cü ilin iyununda o, Fergal MakKrori-ni nokauta saldı və öz çəkisində müvəqqəti çempion Albert Batırqaziyevlə döyüşmək əvəzinə yüngül çəkiyə keçmək qərarına gəldi. Bu səbəbdən də Roç, Devis qarşısında autsayder hesab olunurdu və kağız üzərində Tankın 31-ci peşəkar qələbəsini qazanması gözlənilirdi.
Döyüş olduqca ehtiyatlı başladı. İlk dəqiqədə heç bir zərbə endirilmədi. Daha sonra Roç Devisin bədəninə hücum etməyə başladı və ardıcıl seriya zərbələrini yoxladı, Devis isə sadəcə gülümsəyirdi. İkinci raunddan etibarən Roç fəallaşdı, lakin Tank da cavab verdi, bir neçə kombinasiyanı bədən zərbələri ilə tamamladı və hücumlarına daha çox güc qoydu.
Dördüncü raundda Roç dəqiq zərbələr endirdi, lakin Devis dərhal qarşılıq verdi. Raundun sonlarına yaxın Devis hakimə Roçun qeyri-qanuni texnika tətbiq etdiyini bildirdi, lakin diqqəti yayındığı an bir neçə güclü baş zərbəsi aldı. Beşinci raundun ortalarına doğru dəqiq zərbələrin statistikası Roçun xeyrinə idi. O, Devisin təzyiqindən qorxmur, qarşılıq verir və hətta rəqibini psixoloji təzyiq altına salmağa çalışırdı. Altıncı raund da mübahisələrlə başladı, lakin sonra Devis ağır seriya ilə Roçu sarsıtdı. Çempion yavaş-yavaş üstünlüyü öz xeyrinə artırmağa başladı.
Devisin ardıcıl uğurlu hücumlarından sonra Roç yenidən fəallaşdı, çempionu ipə dirəyərək zərbələr endirməyə çalışdı. Devisin cavabları sərt olsa da, Roç özünü kifayət qədər güclü hiss edirdi. O, epizodları qazanmağa çalışır, apperkotlardan və güclü zərbələrdən istifadə edirdi. Doqquzuncu raunddan etibarən Devis daha çox hücum təşəbbüsü göstərir, zərbələrinə güc qoyur və açıq döyüşə girməyə çalışırdı.
Çempionluq raundları nisbətən sakit başladı, heç bir boksçu tələsmirdi. İlk təşəbbüsü Roç göstərdi və ardıcıl hücum seriyası ilə irəlilədi. Devis isə onu qarşılıqlı mübadiləyə çəkməyə çalışırdı. Statistikaya əsasən, Roç daha çox zərbə endirsə də, Devisin dəqiqlik faizi daha yüksək idi. 11-ci raundda Devis hücuma keçdi və Roçu müxtəlif hündürlüklərdə zərbələrlə bombardman etdi. Lakin Roç qarşılıq verməyə davam edirdi və həcmi üstünlük təşkil edirdi. Son raundda Roç döyüşə tam nəzarət edirdi – Devisin bir zərbəsinə qarşı üç dəqiq zərbə endirirdi. O, Tankın gücündən çəkinmir və hücumlarını davam etdirirdi.
Nəticədə olduqca gərgin və rəqabətli bir döyüş alındı. Roç gözləniləndən daha yaxşı performans sərgilədi və bəlkə də Devisin favorit olması onu çox arxayınlaşdırmışdı. Döyüşdə sürpriz nəticə çox yaxın idi, lakin Roç qələbə qazana bilmədi – iki hakim heç-heçə qərarı verdi, biri isə Devisi qalib elan etdi. Bu nəticə nə Devisin, nə də onun azarkeşlərinin gözlədiyi idi.
Lamont Roç döyüşdən sonra belə dedi: “Tankla rəqabət apara biləcəyimi bilirdim. Bu mənim şansım idi və sübut etdim ki, bu səviyyədə olmağa layiqəm. Dayanmaq fikrim yoxdur, revanş və ya yeni çəki dərəcəsində daha güclü rəqiblə döyüş istəyirəm”.
Devis isə bildirib ki, “Son üç raundda bütün suallara cavab verdim. Ona təmiz və güclü zərbələr endirirdim və hiss edirdim ki, get-gedə zəifləyir”.
