Azərbaycan boksçusu Əli Baxışov Serbiyanın Loznitsa şəhərində keçirilən U-19 Avropa çempionatında uğurlu çıxışını davam etdirərək yarımfinal mərhələsinə yüksəlib. 60 kq çəki dərəcəsində mübarizə aparan milli üzvü bununla özü üçün ən azı bürünc medalı təmin edib.
Baxışov 1/4 final qarşılaşmasında Slovakiya təmsilçisi Kristian Haraşiki ilə üz-üzə gəlib. Azərbaycan boksçusu üç raundun yekununda hakimlərin 4:1 qərarı ilə rəqibini məğlub edərək qitə çempionatının ən güclü dörd idmançısı sırasına daxil olub.
Baxışov final uğrunda Türkiyə boksçusu ilə döyüşəcək
Əli Baxışovun növbəti sınağı avqustun 20-də olacaq. Azərbaycan təmsilçisi finala vəsiqə uğrunda Türkiyə boksçusu Furkan Avarla qarşılaşacaq. Qələbə Baxışova Avropa çempionatında ən azı gümüş medalı təmin edəcək.
60 kq-da çıxış edən boksçu bu il beynəlxalq yarışlarda da fəal iştirak edib. İyunda Sarayevoda keçirilən “Olimpiya Ümidləri” turnirində Əli Baxışov finalda italiyalı rəqibini məğlub edərək qızıl medal qazanmışdı. Azərbaycan millisi həmin yarışda ümumilikdə 12 medala – 7 qızıl, 3 gümüş və 2 bürüncə sahib çıxmışdı.
Baxışov iyulda Almaniyanın Frankfurt-an-der-Oder şəhərində təşkil olunan Brandenburg U-19 Kubokunda da Azərbaycan millisinin heyətində mübarizə aparıb. Həmin turnir Loznitsadakı Avropa çempionatına hazırlıq mərhələlərindən biri olub.
Azərbaycanın U-19 Avropa çempionatında medalını təmin edən digər təmsilçisi Banuçiçək Nəsirlidir. 48 kq çəki dərəcəsində yarışan boksçu da yarımfinala yüksəlib. Nəsirli avqustun 20-də final uğrunda irlandiyalı Ellen Coysla döyüşəcək.
Banuçiçək Nəsirli ötən il Ostravada keçirilmiş U-19 Avropa çempionatında gümüş medal qazanıb. Beləliklə, o, Loznitsada ardıcıl ikinci il qitə çempionatının mükafatçıları sırasında yerini təmin edib.
Loznitsadakı U-19 Avropa çempionatında həm oğlanlar, həm də qızlar arasında 10 çəki dərəcəsində qaliblər müəyyənləşəcək. Yarış avqustun 22-dək davam edəcək.
