Azərbaycanlı güləşçi Elnurə Məmmədova (53 kq) Albaniyanın paytaxtı Tiranada keçirilən 23 yaşadək idmançılar arasında Avropa çempionatında final mərhələsinə vəsiqə qazanıb. İdmançımız mübarizəyə inamlı şəkildə başlayaraq əvvəlcə İtaliyanın təmsilçisi Mariya Feroneyə (11:0), ardınca isə İspaniya nümayəndəsi Karla Solerə (12:0) heç bir xal vermədən qələbə qazanıb. Finalda Elnurə Məmmədovanın rəqibi Rusiyanı təmsil edən Yekaterina Karpuşkina olacaq.
Digər Azərbaycan güləşçilərinin nəticələri
Digər azərbaycanlı güləşçilər isə fərqli nəticələr göstəriblər. Gültəkin Şirinova (57 kq) 1/4 finalda Belarus təmsilçisi Arina Martınovaya 2:10 hesabı ilə məğlub olub. O, təsəlliverici görüşdə Türkiyədən olan Emine Çakmakla qarşılaşacaq.
Ruzanna Məmmədova (65 kq) ilk mərhələdə Polşadan olan Olqa Padoşik üzərində (6:3) qələbə qazanıb. Ardınca isə Rusiya idmançısı Yekaterina Koşkinanı 8:6 hesabı ilə məğlub edərək yarımfinala adlayıb. Lakin bu mərhələdə Belaruslu Kseniya Tsiareniyə 1:3 hesabı ilə uduzub. O, bürünc medal uğrunda mübarizədə Aleksandra Rıbak (Ukrayna) – Beyza Akkuş (Türkiyə) cütünün qalibi ilə qarşılaşacaq.
Birgül Soltanova (62 kq) isə 1/4 finalda Fransalı İris Tibuya 1:3 hesabı ilə məğlub olub və çempionluq şansını əldən verib.
