“Barselona”nın hücumçusu Ferran Torres gələcəyi ilə bağlı müzakirələrə aydınlıq gətirən açıqlama verib. İspaniyalı futbolçu klub rəhbərliyinin onunla yeni müqavilə barədə danışıqlara başlamasını istədiyini bildirib. Onun sözlərinə görə, tərəflər arasında açıq dialoq qurularsa, bütün məsələləri həll etmək mümkündür.
Torresin bu açıqlaması fonunda onun Kataloniya klubundan ayrılacağı ilə bağlı xəbərlər yenidən gündəmə gəlib. Son məlumatlara görə, futbolçunun gələcəyi yay transfer pəncərəsinin diqqət mərkəzində olan mövzulardan biridir.
26 yaşlı hücumçu “Barselona”da qalmağa qarşı olmadığını gizlətmir. Lakin o hesab edir ki, klub da onun xidmətində maraqlı olduğunu konkret addımlarla göstərməlidir. Ferran Torres yeni müqavilə danışıqlarının başlanmasının vacibliyini vurğulayaraq, bütün fikir ayrılıqlarının qarşılıqlı anlaşma yolu ilə həll edilə biləcəyini bildirib.
İspan futbolçu son mövsümlərdə komandaya vacib töhfələr versə də, özünə verilən dəyərin yetərli olmadığını düşündüyü bildirilir.
PSJ transfer üçün hərəkətə keçir
Transfer bazarı ilə bağlı yayılan xəbərlərə əsasən, PSJ yaxın günlərdə “Barselona” ilə Ferran Torresin mümkün transferi barədə rəsmi danışıqlara başlamağı planlaşdırır. Fransa çempionunun ispaniyalı forvardı hücum xəttini gücləndirmək üçün əsas namizədlərdən biri hesab etdiyi qeyd olunur.
Əgər “Barselona” futbolçu ilə yeni müqavilə imzalamaq istiqamətində addım atmasa, Torresin karyerasını Liqa 1-də davam etdirmək variantını ciddi şəkildə dəyərləndirəcəyi istisna edilmir. Qarşıdakı günlər həm klubun, həm də futbolçunun gələcəyi baxımından həlledici ola bilər.
