Misli Premyer Liqasının oyunlarına ev sahibliyi etmək üçün Yevlax şəhər stadionunda yaranan çatışmazlıqlar aradan qaldırılır. Xəbər agentliyinə “Karvan-Yevlax” klubunun vitse-prezidenti Kənan Kərimov məlumat verib. O, stadionda bir sıra təmir işlərinin icra olunduğunu xüsusi vurğulayıb:
“Stadionda mövcud olan qüsurları aradan qaldırmaq üçün işlər artıq davam edir. Peşəkar Futbol Liqasının nümayəndələri sentyabrın ortalarında arenaya baxış keçirmişdilər. O gün hava şəraiti yağışlı idi, bu səbəbdən ot örtüyünə ziyan vura biləcək rezin materiallar tökmək mümkün olmamışdı. Ancaq demək olar ki, təmir işləri yekunlaşmaq üzrədir.”
Kənan Kərimov yaxın günlərdə PFL nümayəndələrinin yenidən baxış keçirməsi planlaşdırıldığını ifadə edib:
“Əsas məqsədimiz bütün ev oyunlarımızı öz doğma meydanımızda təşkil etməkdir. Gələcək günlərdə yenidən PFL-ə rəsmi dəvət göndərəcəyik. Hələ vaxtımız var və işlər plana uyğun davam edərsə, X turda qarşılaşacağımız oyunu Yevlax stadionunda keçirmək istəyirik.”
Nəzərə çatdırılır ki, “Karvan-Yevlax” mövsümün əvvəlindən etibarən matçlarını Şamaxı şəhər stadionunda keçirir. Klub X turda, oktyabrın 31-dən noyabrın 2-dək olan müddətdə “Zirə” komandası ilə üz-üzə gələcək.
