“Al-Ahli” ilə “İnter Mayami” arasındakı qarşılaşmaya az bilet satılıb
FIFA-nın təşkil etdiyi Klublararası Dünya Çempionatının 2025-ci il buraxılışının açılış oyunu üçün biletlərə maraq gözlənilənin çox altında qalıb.
İyunun 15-də Mayami Qardensdə yerləşən 65 326 nəfərlik “Hard Rock” stadionunda Misirin “Əl-Əhli” klubu ilə ABŞ-ın “İnter Mayami” komandası üz-üzə gələcək. Lakin “The Times” nəşrinin verdiyi məlumata görə, bu oyuna cəmi 20 minə yaxın bilet satılıb.
FIFA qiymətləri endirib
Azarkeş sayını artırmaq üçün FIFA artıq bilet qiymətlərində ciddi endirimlər edib. Əvvəllər 349 ABŞ dollarına təklif edilən biletlərin qiyməti hazırda 55 dollardan başlayır. Bu addımın əsas məqsədi stadionun doluluğunu artırmaq və turnirin daha geniş auditoriya tərəfindən izlənilməsini təmin etməkdir.
130 ölkədən azarkeş gözlənilir
FIFA-nın ümidi onadır ki, Klublararası Dünya Çempionatına 130-dan çox ölkədən azarkeşlər qatılacaq. Turnir iyunun 15-dən iyulun 13-dək davam edəcək.
Bu oyunla birlikdə yeni formatda keçiriləcək 2025-ci il Klublararası Dünya Çempionatının startı veriləcək və bu turnir gələcək illər üçün də nümunə rolunu oynaya bilər.
