Snuker üzrə sabiq dünya çempionu, şotlandiyalı Qrem Dott iki uşağa qarşı cinsi xarakterli cinayətlər törətməkdə təqsirli bilinərək 7 il müddətinə azadlıqdan məhrum edilib. Hökm Edinburq Yüksək Məhkəməsində elan olunub.
49 yaşlı keçmiş snukerçi avqustda Qlazqo Yüksək Məhkəməsində keçirilən beş günlük prosesdən sonra iki epizod üzrə təqsirli bilinmişdi. Dott məhkəmə zamanı ittihamları rədd etsə də, andlılar heyəti onun təqsirli olduğu qənaətinə gəlib.
Cinayətlər iki fərqli dövrdə törədilib
Məhkəmədə müəyyən edilib ki, Dott 1993-1996-cı illərdə bir qıza, 2006-2010-cu illərdə isə bir oğlana qarşı seksual xarakterli zorakı hərəkətlər edib. Hər iki zərərçəkmiş hadisələr başlayan zaman ibtidai məktəb yaşında olub.
Hakim Lord Harrouer Dottun uşaqların etimadından ciddi şəkildə sui-istifadə etdiyini bildirib. Keçmiş idmançı cəza ilə yanaşı, qeyri-müəyyən müddətə cinsi cinayət törətmiş şəxslərin reyestrində saxlanılacaq.
Snuker karyerası da rəsmən başa çatdı
Dott peşəkar snukerdə ən böyük uğurunu 2006-cı ildə dünya çempionu olmaqla qazanıb. O, finalda Piter Ebdonu məğlub edib. Şotlandiyalı həmçinin 2004 və 2010-cu illərdə dünya çempionatının finalına yüksəlib.
İttihamların irəli sürülməsindən sonra Dünya Peşəkar Bilyard və Snuker Assosiasiyası (WPBSA) 2025-ci ilin aprelində Dottu yarışlardan kənarlaşdırmışdı. Təqsirli bilinməsindən sonra onun assosiasiyaya üzvlüyü birdəfəlik ləğv edilib. Dottun adı Dünya Snuker Turunun Şöhrət zalından da çıxarılıb.
Beləliklə, 2006-cı ilin dünya çempionunun peşəkar snukerlə bütün rəsmi əlaqələri kəsilib və o, məhkəmənin qərarı ilə yeddi il həbs cəzası çəkəcək.
