UFC-nin orta çəki üzrə çempionu Şon Striklend sosial şəbəkədə ABŞ rəhbərliyini sərt şəkildə tənqid edən paylaşım edib. Amerikalı MMA döyüşçüsü ölkədəki nəzarət sistemlərindən danışaraq “inqilabın” baş verməli olduğunu yazıb.
35 yaşlı idmançı fikirlərini “X” hesabında bölüşüb. Striklend paylaşımında müşahidə kameralarını və ABŞ Milli Təhlükəsizlik Agentliyini (NSA) nümunə göstərərək ölkənin qurucularının müasir nəzarət sistemlərinə münasibətinin necə olacağını sorğulayıb.
Striklend sərt ifadələr işlədib
“Mən ölkəmizin rəhbərləri qarşısında o qədər utanıram ki… Təsəvvür edə bilərsinizmi, ölkənin qurucuları bu gün total nəzarət sistemini, kameraları, Milli Təhlükəsizlik Agentliyini (NSA) görsəydilər, nə düşünərdilər? İnqilab baş verməlidir. Hər şeyi düzəldəcək yeganə yol budur. Həm də çoxlu dar ağacları”, – Striklend yazıb.
Bu, amerikalı döyüşçünün ictimai müzakirələrə səbəb olan ilk açıqlaması deyil. Striklend daha əvvəl də siyasi və sosial mövzularda kəskin fikirləri ilə diqqət çəkib.
2023-cü ildə o, qadınların seçki hüququ ilə bağlı mübahisəli açıqlamalar vermiş, qadınların iş həyatındakı rolunu da tənqid etmişdi. Onun həmin fikirləri geniş rezonans doğurmuş və müxtəlif idmançılar tərəfindən tənqid edilmişdi.
Striklend hazırda UFC-nin orta çəki üzrə çempionudur. O, 2026-cı il mayın 9-da UFC 328 turnirində Həmzət Çimayevlə beş raundluq titul döyüşünə çıxıb və hakimlərin bölünmüş qərarı ilə qalib gəlib.
Bu nəticə ilə amerikalı karyerasında ikinci dəfə UFC-nin orta çəki kəmərinə sahib olub. Onun peşəkar MMA göstəricisi hazırda 31 qələbə və 7 məğlubiyyətdir.
