Stolüstü tennis üzrə ölkə çempionatı yekunlaşıb və turnirin qalibləri müəyyən edilib. Yarışın son mərhələsi Bakıda yerləşən “Şüa” İdman Kompleksində keçirilib və final görüşlərində idmançılar müxtəlif kateqoriyalar üzrə mübarizə aparıblar.
Turnirin həlledici günündə fərdi, qoşa və qarışıq qoşa növləri üzrə qaliblər bəlli olub. Kişilərin şəxsi yarışının final qarşılaşmasında Onur Quluzadə rəqibi Rüstəm Hacılı üzərində qələbə qazanaraq ölkə çempionu adına sahib çıxıb. Bu kateqoriyada Xəyal Həşimli və Adil Əhmədzadə üçüncü yerlə kifayətləniblər.
Qadınların şəxsi yarışında isə final görüşündə Aylin Əsgərovanı məğlub edən Mərziyyə Nurmətova çempion titulunu qazanıb.
Qoşa və qarışıq qoşa yarışlarının nəticələri
Kişilərin qoşa mübarizəsində çempionluq Onur Quluzadə – Nihad Məmmədov duetinə qismət olub. Hilal Həsənov – Vəzir Allahverdiyev cütlüyü ikinci yeri tutub. Üçüncü pilləni isə Xəyal Həşimli – Əliverdi Şahgəldiyev və Rüstəm Hacılı – Adil Əhmədzadə tandemi bölüşüb.
Qadınların qoşa yarışında qalib Aylin Əsgərova – Mərziyyə Nurmətova cütü olub. İkinci yerdə Xədicə Əbilzadə – Arzu Aslanova, üçüncü pillədə isə iki komanda qərarlaşıb:
- Məryəm İmanova – Yağmur Məmmədli
- Ləman Abdulhəmidova – Zemfira Mikayılova
Qarışıq qoşa kateqoriyasında isə Adil Əhmədzadə – Mərziyyə Nurmətova tandemi birinci yeri tutub. Onlar finalda Hilal Həsənov – Səbinə Məmmədova cütlüyünü məğlub ediblər. Üçüncü yerləri Elşən Hüseynov – Nigar Mahmudova və Onur Quluzadə – Yağmur Məmmədli qazanıblar.
Komanda yarışlarının qalibləri
Komanda yarışlarında da qaliblər müəyyənləşib. Kişilərin mübarizəsində “Bakı-1” komandası çempion olub. “Bakı-2” ikinci yeri tutub, “Bakı-3” və “Şabran” komandaları isə üçüncü pillədə qərarlaşıb.
Qadınların komanda yarışında isə “Sumqayıt-1” kollektivi birinci olub. “Bakı-1” ikinci, “Bakı-2” və “Sumqayıt-2” komandaları üçüncü yeri tutublar.
Yarışın sonunda fərqlənən idmançılara Azərbaycan Gənclər və İdman Nazirliyi tərəfindən diplom və medallar təqdim olunub. Bundan əlavə, qaliblər Azərbaycan Stolüstü Tennis Federasiyasının xüsusi mükafatları ilə də təltif ediliblər.
