Avstraliyalı boksçu Tim Tszyu Sidneydə keçirilən möhtəşəm döyüş gecəsinin əsas qarşılaşmasında ABŞ təmsilçisi Errol Spence Jr.-ni hakimlərin yekdil qərarı ilə məğlub edib. 12 raund davam edən orta çəki döyüşündən sonra Spence peşəkar karyerasını başa vurduğunu açıqlayıb.
Afterpay Arena-da baş tutan qarşılaşma 36 yaşlı amerikalının təxminən üç illik fasilədən sonra rinqə dönüşü idi. Lakin keçmiş vahid yarımorta çəki dünya çempionu görüş boyu əvvəlki sürətini və fəallığını nümayiş etdirə bilmədi. Tszyu isə xüsusilə ikinci yarıda üstünlüyü ələ alaraq güclü sağ zərbələri və daimi təzyiqi ilə rəqibini çətin vəziyyətə saldı.
Hakimlər döyüşü 118:110, 117:111 və 117:111 hesabları ilə avstraliyalının xeyrinə qiymətləndirdilər.
Spence rinqlə vidalaşdığını təsdiqlədi
Döyüşdən sonra Errol Spence karyerasını başa vurduğunu gizlətməyib.
“Düşünürəm ki, bəli. Sağlamlığım yerindədir, maddi baxımdan da hər şey qaydasındadır. Gözəl ailəm var və Allaha şükür edirəm ki, bu idmanı sağlam şəkildə tərk edirəm”, – deyə amerikalı boksçu bildirib.
Spence sonuncu dəfə 2023-cü ildə Terence Crawford-a uduzduqdan sonra rəsmi döyüş keçirməmişdi. Uzun fasilə onun fiziki hazırlığında da hiss olunurdu. İlk raundlarda rəqibinin bədəninə uğurlu zərbələr endirsə də, görüş irəlilədikcə tempi aşağı düşdü və Tszyunun hücumlarının qarşısını almaqda çətinlik çəkdi.
Bu məğlubiyyət Spence-in peşəkar karyerasında cəmi ikinci olub. Onun statistikası 28 qələbə (22 nokaut) və 2 məğlubiyyət olaraq qalıb.
Tszyu dünya titulu uğrunda döyüşə yaxınlaşdı
Tim Tszyu isə qələbədən sonra növbəti məqsədinin yenidən dünya çempionluğu uğrunda mübarizə aparmaq olduğunu bildirib.
“Əfsanəvi boksçu ilə döyüşəcəyimi düşündükcə gecələr yata bilmirdim. İndi onun niyə bu qədər böyük idmançı olduğunu daha yaxşı anlayıram. Dünya titulu uğrunda döyüşmək istəyirəm, amma Errol Spence kimi rəqibə qalib gəlmək mənim üçün çempionluq qədər dəyərlidir”, – deyə avstraliyalı qeyd edib.
Bu nəticə Tszyunun ardıcıl üçüncü qələbəsi olub. Keçmiş WBO çempionu Sebastian Fundora və Baxram Murtazəliyevə məğlubiyyətlərdən sonra karyerasını yenidən yüksəlişə aparır və orta çəkidə dünya titulu uğrunda əsas namizədlərdən birinə çevrilib.
