Almaniyalı tennisçi Aleksandr Zverev 2026-cı ildə karyerasının ən uğurlu mövsümlərindən birini keçirir. Mövsüm ərzində iki “Böyük Dəbilqə” tituluna sahib çıxan 29 yaşlı tennisçi ATP Finals uğrunda yarışda ön sıralardadır və sentyabrın sonuna dünya reytinqinin lideri Yannik Sinnerlə xal fərqini ciddi şəkildə azaldıb.
İndi Zverevin qarşısında karyerasında hələ nail olmadığı əsas hədəflərdən biri qalır – ATP reytinqində ilk dəfə birinci pilləyə yüksəlmək. Uimbldondan dərhal sonra bu ssenari çox çətin görünürdüsə, son aylarda yaranmış vəziyyət almaniyalı üçün real fürsət yaradıb.
2026-cı ildə Zverev uzun müddət gözlədiyi ilk “Böyük Dəbilqə” titulunu “Rolan Qarros”da qazanıb. O, finalda Flavio Kobollini məğlub edərək Parisdə çempion olub. Təxminən üç ay sonra isə US Open-in həlledici görüşündə Ben Şeltonu üstələyərək mövsümdə ikinci “Böyük Dəbilqə” kubokuna sahib çıxıb.
Buna qədər Zverev üç dəfə belə turnirlərin finalına yüksəlsə də, hər dəfə məğlub olmuşdu. O, US Open-2020-də Dominik Timə, “Rolan Qarros-2024”də Karlos Alkarasa, Australian Open-2025-də isə Yannik Sinnerə uduzmuşdu. Beləliklə, almaniyalı 29 yaşında nəinki ilk “Böyük Dəbilqə” titulunu əldə edib, hətta bir mövsümdə dörd əsas turnirdən ikisini qazanıb.
Sinnerlə Zverev arasındakı böyük fərq necə azaldı?
Uimbldon-2026 başa çatdıqdan sonra Sinnerin hesabında 13 450, Zverevin aktivində isə 8 480 xal var idi. Almaniyalı karyerasında ilk dəfə Uimbldonun finalına yüksəlsə də, titul uğrunda qarşılaşmada məhz Sinnerə məğlub olmuşdu.
Həmin vaxt iki tennisçi arasındakı fərq 4 970 xal təşkil edirdi. Belə vəziyyətdə Zverevin yaxın müddətdə dünyanın bir nömrəli raketkasına çevrilməsi olduqca çətin görünürdü.
Lakin sonrakı həftələr reytinq mübarizəsini tamamilə dəyişib. Sinner əvvəlcə Sinsinnati “Masters” turnirindən çəkilib, daha sonra US Open-də də iştirak etməyəcəyini açıqlayıb. İtaliyalı 2025-ci ildə hər iki yarışda finala qədər irəlilədiyindən müdafiə etməli olduğu xalların böyük hissəsini itirib: Sinsinnatidən 650, US Open-dən isə 1 300 xal.
Zverev Monreal və Sinsinnatidə keçirilən “Masters” turnirlərində gözlənilən qədər uğurlu nəticə göstərməsə də, US Open ərəfəsində xal ehtiyatını böyük ölçüdə qoruyub.
Nyu-Yorkdakı turnir başlamazdan əvvəl vəziyyət onun üçün xeyli əlverişli idi. Sinner yarışda iştirak etmirdi, uzun fasilədən qayıdan Karlos Alkaras optimal formasından uzaq idi, Zverev isə liderlə fərqi maksimum azaltmaq və mövsümdə ikinci “Böyük Dəbilqə” titulunu qazanmaq fürsəti əldə etmişdi.
Almaniyalı bu şansdan tam istifadə edib. 2020-ci ildə Dominik Timə qarşı US Open finalında yaşadığı ağır məğlubiyyətdən altı il sonra yenidən Nyu-Yorkda finala çıxan Zverev bu dəfə kuboku əldən verməyib.
US Open-dən sonra Sinnerin aktivində 11 500, Zverevin hesabında isə 9 690 xal qalıb. Beləliklə, Uimbldondan sonra 4 970 xal olan fərq cəmi 1 810 xala düşüb.
Asiya seriyası Zverevə liderlik şansı yaradır
Zverevin ATP reytinqində birinci yerə yüksəlməsi üçün əsas fürsət qarşıdakı Asiya seriyasıdır. Bir neçə ay əvvəl demək olar ki, real görünməyən ssenari indi Pekin və Şanxaydakı nəticələrdən asılıdır.
Zverev üçün əlavə imkan Sinnerin Pekində keçiriləcək ATP 500 turnirində iştirak etməməsi ilə yaranıb. İtaliyalı ötən mövsüm burada çempion olduğuna görə 500 xal müdafiə etməli idi. Bu xallar silindikdən sonra onun göstəricisi 11 000 xala enəcək. Zverev isə Pekində mübarizəyə 9 630 xalla başlayacaq.
Nəticədə turnir ərəfəsində reytinqin ilk iki pilləsində qərarlaşan tennisçilər arasında fərq 1 370 xal olacaq. Müqayisə üçün, Uimbldondan dərhal sonra həmin fərq 4 970 xal idi.
Lakin Zverevin Asiya seriyası zamanı ilk dəfə dünyanın bir nömrəli raketkasına çevrilməsi üçün maksimum nəticəyə yaxın çıxış etməsi tələb olunur.
İlk addım Pekində çempion olmaqdır. Bu halda almaniyalı Sinnerlə fərqi 910 xala qədər azalda bilər. Daha sonra əsas mübarizə Şanxay “Masters” turnirində davam edəcək.
Sinner və Zverev ötən mövsüm Şanxayda eyni nəticə göstərərək üçüncü mərhələdə mübarizəni dayandırmış və hərəyə cəmi 50 reytinq xalı qazanmışdılar. Buna görə də hər iki tennisçinin bu turnirdə müdafiə edəcəyi xal azdır.
Hesablamaya əsasən, Zverev Pekindən sonra Şanxay “Masters” turnirini də qazansa, Sinner isə yarışdan çəkilsə və ya üçüncü mərhələdən irəli gedə bilməsə, almaniyalının aktivində 11 040 xal olacaq. Sinner isə 10 950 xalda qalacaq.
Bu ssenaridə Zverev rəqibini 90 xal qabaqlayacaq. Beləliklə, Pekin və Şanxayda ardıcıl iki titul almaniyalı tennisçiyə oktyabrın 19-da karyerasında ilk dəfə ATP reytinqinin zirvəsinə yüksəlmək imkanı verə bilər.
