22 dəfə “Böyük Dəbilqə” çempionu, dünyanın keçmiş bir nömrəli tennisçisi Rafael Nadal peşəkar karyerasını başa vuracağını elan edib. O, bunu Devis Kubokunun final mərhələsindən sonra edəcəyini bildirib.
Nadal bu barədə sosial şəbəkələrində açıqlama verib:
“Buradayam ki, peşəkar tennisdən ayrılacağımı elan edim. Son illər, xüsusən də son iki il mənim üçün çox çətin keçdi. Düşünmürəm ki, son vaxtlar məhdudiyyətlər olmadan oynaya bildim. Bu qərar mənim üçün çox çətin oldu və uzun müddət düşündüm. Lakin həyatda hər şeyin bir başlanğıcı və sonu var və düşünürəm ki, indi uzun və mənim təsəvvür edə bilməyəcəyim qədər uğurlu olan karyeramı bitirmək üçün ən uyğun zamandır.”
Nadal karyerasının Devis Kubokunun finalı ilə başa çatmasının simvolik olduğunu vurğulayıb:
“Mənim karyeram sanki tam bir dövrü tamamlayır. Peşəkar tennisçi kimi ilk böyük sevinclərimdən biri 2004-cü ildə Sevilyada Devis Kubokunun finalı idi. Son turnirimin ölkəmi təmsil etdiyim Devis Kubokunun finalı olması məni çox sevindirir.”
Xatırladaq ki, 2024-cü il Devis Kubokunun final mərhələsi 19-24 noyabr tarixlərində İspaniyanın Malaga şəhərində keçiriləcək.
