Olimpiya çempionu Hidayət Heydərov Birləşmiş Ərəb Əmirliklərinin paytaxtı Əbu-Dabidə keçirilən “Böyük Dəbilqə” turnirinin finalına yüksələ bilməyib. 73 kq çəki dərəcəsində mübarizə aparan cüdoçumuz yarımfinalda Tacikistan təmsilçisi Masudi Ahmadzodaya qızıl xal bölümündə məğlub olub.
Beləliklə, Azərbaycan cüdoçusu turnirin bürünc medalı uğrunda görüşə çıxacaq. Yarışın ikinci günü onun üçün ilk mərhələdən azad başlayıb: rəqib serbiyalı Baysanqul Baqayevlə rumıniyalı Bors Dumitresku arasındakı görüşün qalibi olmalı idi və bu, rumıniyalı cüdoçu oldu.
Qızıl xal bölümündə üç qələbə
1/16 finalda Dumitreskunu qızıl xalla keçən Heydərov 1/8 finalda belçikalı Abdul Malik Umayevi, 1/4 finalda isə kosovolu Akil Gyakovanı da eyni üsulla üstələyib. Onun bu üç görüşünün taleyi də qızıl xal bölümündə həll olunub.
Yarımfinalda isə tacikistanlı Ahmadzoda daha üstün çıxıb və olimpiya çempionumuz finaldan kənarda qalıb.
Süleymanov və Ağayeva medal uğrunda mübarizəni dayandırıb
Həmin gün 73 kq çəki dərəcəsində Kamran Süleymanov da tatamiyə çıxıb. Onun ilk rəqibi özbəkistanlı Zamoxşari Bekmurodovla kiprli Xristos Dimitriadi arasındakı görüşün qalibi müəyyənləşməli idi və bu, özbəkistanlı cüdoçu oldu. Süleymanov 1/16 finalda Bekmurodova ipponla uduzaraq yarışı başa vurub.
Qadınların 70 kq çəki dərəcəsində Südabə Ağayeva ilk görüşdə ABŞ təmsilçisi Nensi Nquyeni məğlub edib, lakin 1/8 finalda portuqaliyalı Tais Pinaya uduzub. Həmin qarşılaşmada rəqib iki yuko, Ağayeva isə bir yuko xalı qazanıb.
Turnirin ilk günündə Azərbaycan təmsilçilərindən Balabəy Ağayev (60 kq) və Könül Əliyeva (48 kq) qızıl, Rəşad Yelkiyev (66 kq) isə bürünc medal qazanıb.
