Quba şəhərində fəaliyyət göstərən Şahdağ Güləş Klubunun yunan-Roma güləşi üzrə məşqlərin keçirildiyi idman zalı əsaslı yenidənqurmadan sonra istifadəyə verilib. Yenilənmiş idman məkanında məşq şəraiti müasir standartlara uyğunlaşdırılıb və gənc idmançıların hazırlıq imkanları daha da genişləndirilib.
Federasiya kluba yeni güləş xalçası hədiyyə edib
Yenilənmiş zalda keçirilən baxış zamanı Azərbaycan Güləş Federasiyasının vitse-prezidentləri, olimpiya çempionları Namiq Abdullayev və Fərid Mansurov, federasiyanın baş katibi Pərvin Piriyev, Quba Rayon İcra Hakimiyyəti başçısının müavini Şahin İsrafilov, sektor müdiri Anar Məmmədov və Quba-Xaçmaz Regional Gənclər və İdman İdarəsinin rəisi Qumru Məmmədova iştirak ediblər.
Azərbaycan Güləş Federasiyası tərəfindən kluba müasir standartlara cavab verən yeni güləş xalçası təqdim olunub. Şahdağ Güləş Klubunun yunan-Roma güləşi üzrə məşqçisi Musa Mirzəyev qonaqlara zalda yaradılmış şərait, məşq prosesi və klubun fəaliyyəti barədə ətraflı məlumat verib.
Yeni bölmələrin yaradılması da müzakirə olunub
Görüş zamanı Qubada güləş idman növünün inkişaf perspektivləri geniş müzakirə edilib. Bildirilib ki, gələcəkdə yunan-Roma güləşi ilə yanaşı, sərbəst və qadın güləşi bölmələrinin də fəaliyyətə başlaması üçün müvafiq addımların atılması planlaşdırılır.
Qeyd olunub ki, yenilənmiş zal regionda güləşin daha da kütləviləşməsinə, gənc idmançıların peşəkar hazırlıq səviyyəsinin yüksəldilməsinə və perspektivli güləşçilərin yetişdirilməsinə mühüm töhfə verəcək. Son illərdə Azərbaycan Güləş Federasiyası paytaxtla yanaşı, bölgələrdə də idman infrastrukturunun yenilənməsini prioritet istiqamətlərdən biri kimi davam etdirir ki, bu da regionlarda istedadlı idmançıların üzə çıxmasına əlavə imkanlar yaradır.
