Azərbaycan çempionu “Sabah” bu gün UEFA Çempionlar Liqasının 2026/2027 mövsümünün I təsnifat mərhələsinin cavab oyununda Uels təmsilçisi The New Saints (TNS) ilə üz-üzə gələcək. Masazır klubu ilk oyunda qazandığı üstünlüyü qoruyaraq növbəti mərhələyə yüksəlməyi hədəfləyir.
Qarşılaşma Uelsin Osvestri şəhərində yerləşən “Park Hall” stadionunda keçiriləcək və Bakı vaxtı ilə saat 21:30-da start götürəcək. İlk matçda “Sabah” doğma meydanda rəqibini 2:0 hesabı ilə məğlub etmişdi. Həmin görüşdə Velko Simiç və Kaheem Parris fərqlənərək Azərbaycan klubuna vacib üstünlük qazandırmışdılar.
İki oyunun nəticəsinə əsasən qalib gələn komanda UEFA Çempionlar Liqasının II təsnifat mərhələsinə yüksələcək. Növbəti raundda rəqib Şimali Makedoniyanın “Vardar” klubu ilə Finlandiyanın KuPS komandası arasındakı cütün qalibi olacaq.
TNS öz meydanında uğurlu çıxışları ilə seçilsə də, “Sabah” ilk qarşılaşmada həm müdafiədə etibarlı oyun nümayiş etdirib, həm də ikinci hissədə vurduğu iki qolla üstünlüyü ələ keçirib. Azərbaycan çempionu bu üstünlüyü qorumaqla klub tarixində UEFA Çempionlar Liqasında növbəti mərhələyə yüksəlmək üçün mühüm şans əldə edib.
