2026/2027 mövsümündən etibarən Azərbaycan Premyer Liqasında Video Köməkçi Hakim (VAR) sistemi ilə bağlı yeni qaydalar qüvvəyə minəcək. Dəyişikliklər 2026-cı il dünya çempionatında tətbiq olunan yenilənmiş VAR protokoluna uyğun hazırlanıb və yeni mövsümdən ölkə çempionatında da istifadə ediləcək.
Bu barədə Peşəkar Futbol Liqasının texniki-idman direktoru Elgiz Abbasov Azərbaycan Premyer Liqasının 2026/2027 mövsümünün püşkatma mərasimində məlumat verib. Onun sözlərinə görə, məqsəd hakim qərarlarının daha dəqiq və ədalətli olmasını təmin etməkdir.
VAR hansı epizodlara müdaxilə edəcək?
Elgiz Abbasov bildirib ki, yeni mövsümdən VAR əvvəlki səlahiyyətləri ilə yanaşı, daha iki oyun epizodunun yoxlanılmasına imkan verəcək.
Yeniliklər aşağıdakı halları əhatə edəcək:
- Səhv göstərilmiş birbaşa qırmızı vərəqə ilə bağlı mübahisəli qərarlar
- İkinci sarı vərəqədən sonra verilən qırmızı vərəqə ilə bağlı epizodlar
PFL rəsmisinin sözlərinə görə, bu dəyişikliklər dünya çempionatında tətbiq edilən yenilənmiş VAR mexanizminə əsaslanır və artıq Azərbaycan Premyer Liqasında da istifadə olunacaq.
“Yeniliklər əlavə iki oyun epizodunun araşdırılmasını nəzərdə tutur. Bunlar səhv göstərilən qırmızı vərəqə və ikinci sarı vərəqədən sonra verilən qırmızı vərəqə ilə bağlı epizodlardır. Biz bunu yeni mövsümdə tətbiq edəcəyik”, – deyə Elgiz Abbasov bildirib.
Klublar və media üçün seminarlar keçiriləcək
PFL nümayəndəsi qeyd edib ki, AFFA Hakimlər Komitəsi yeni VAR qaydaları ilə bağlı xüsusi təqdimat hazırlayıb və bu məlumat artıq Premyer Liqa klublarına çatdırılıb.
Abbasovun sözlərinə görə, yaxın vaxtlarda həm klubların nümayəndələri, həm də media üçün maarifləndirici seminarlar təşkil olunacaq. Bu tədbirlərdə yeni VAR protokolunun tətbiqi, hakimlərin qərarvermə mexanizmi və dəyişikliklərin praktiki tərəfləri izah ediləcək.
Azərbaycan Premyer Liqasının 2026/2027 mövsümü 14 avqust tarixində start götürəcək və yeni VAR qaydaları ilk turdan etibarən tətbiq olunacaq.
