UEFA-nın Nyon şəhərində keçirilən püşkatma mərasimindən sonra Azərbaycanın avrokuboklarda mübarizə aparan klublarının III təsnifat mərhələsində qarşılaşa biləcəyi rəqiblər bəlli olub.
Püşkatmanın nəticələrinə əsasən, “Qarabağ”, “Neftçi”, “Zirə” və “Sabah” növbəti mərhələyə yüksələcəkləri halda fərqli ssenarilərlə üzləşəcəklər. UEFA-nın təqviminə əsasən, III təsnifat mərhələsinin ilk oyunları 6 avqustda, cavab görüşləri isə 13 avqustda keçiriləcək.
Avropa Liqasında “Qarabağ” və “Sabah”ın mümkün rəqibləri
UEFA Avropa Liqasının II təsnifat mərhələsində Bolqarıstanın ÇSKA klubunu mübarizədən kənarlaşdıracağı təqdirdə “Qarabağ” növbəti raundda “Şerif” (Moldova) – “Makkabi” Təl-Əviv (İsrail) cütünün qalibi ilə qarşılaşacaq.
Çempionlar Liqasının II təsnifat mərhələsində Finlandiyanın KuPS klubuna məğlub olacağı halda isə “Sabah” mübarizəsini Avropa Liqasında davam etdirəcək. Bakı təmsilçisi III təsnifat mərhələsində “Levski” (Bolqarıstan) – “Universitatya Krayova” (Rumıniya) cütünün məğlubu ilə üz-üzə gələcək.
Konfrans Liqasında “Neftçi”, “Zirə” və “Qarabağ”ı gözləyən ehtimallar
UEFA Konfrans Liqasında “Neftçi” Belarusun “Dinamo” (Minsk) klubunu keçərsə, növbəti mərhələdə “Jelezniçar” (Serbiya) – “Braqa” (Portuqaliya) cütünün qalibi ilə qarşılaşacaq.
“Zirə” Estoniyanın “Payde” komandasını mübarizədən kənarlaşdıracağı halda isə III təsnifat mərhələsində “Santa Koloma” (Andorra) – “Rapid” (Avstriya) duelinin qalibi ilə üz-üzə gələcək.
Bundan əlavə, “Qarabağ” Avropa Liqasında ÇSKA səddini keçə bilməsə, Konfrans Liqasına düşəcək və burada “Dinamo” (Kiyev, Ukrayna) – PAOK (Yunanıstan) cütünün məğlubu ilə qarşılaşacaq.
Azərbaycan təmsilçiləri üçün ikinci təsnifat mərhələsinin nəticələri onların avrokuboklarda yolunu müəyyən edəcək. Bütün komandalar növbəti mərhələyə yüksələcəkləri halda daha güclü rəqiblərlə qarşılaşacaq və avrokubokların pley-off mərhələsinə yaxınlaşmaq uğrunda mübarizə aparacaqlar.
