NBA-nın əfsanəvi basketbolçusu LeBron Ceyms karyerasında növbəti rekordun müəllifi olub. “Philadelphia 76ers”lə müqavilə imzalayan 41 yaşlı ulduz yeni mövsümdə əvvəlki qazancı ilə müqayisədə rekord həcmdə maaş azaldılmasına razılaşıb.
LeBron iki illik, ümumi dəyəri 8 milyon dollar olan müqaviləyə imza atıb. Bununla o, 2026/27 mövsümündə 3,88 milyon dollar qazanacaq. Bu məbləğ onun ötən mövsüm “Los Angeles Lakers”də aldığı 52,63 milyon dollarlıq maaşdan 48,75 milyon dollar azdır. Beləliklə, NBA tarixində bir mövsümdən digərinə ən böyük maaş endirimi məhz LeBrona məxsus olub.
LeBron yeni rekorda imza atdı
Əvvəlki rekord Russell Vestbruka məxsus idi. Təcrübəli oyunçu 2023-cü ildə maaşını 43,2 milyon dollar azaltmışdı. LeBron isə bu göstəricini geridə qoyaraq yeni rekord müəyyənləşdirib.
Məlumata görə, basketbolçu üçün əsas prioritet yüksək qazanc deyil, çempionluq uğrunda mübarizədir. O, “Philadelphia 76ers”in NBA titulunu qazanmaq üçün ən real şans təqdim etdiyini düşündüyündən daha sərfəli maliyyə təkliflərini qəbul etməyib.
Bronni Ceymsin gələcəyi də gündəmdədir
LeBronun Filadelfiyaya keçidindən sonra onun oğlu Bronni Ceymsin də “76ers”ə transfer olunacağı barədə iddialar ortaya çıxıb. Bildirilirdi ki, Filadelfiya klubu “Los Angeles Lakers”ə gələcək ikinci raund draft seçimi və maaş limitində yer açmaq hesabına gənc müdafiəçini heyətinə qata bilər.
Lakin hər iki basketbolçunun agenti Riç Pol bu ehtimalları təkzib edib. Onun sözlərinə görə, LeBron və Bronni “paket transfer” deyil və hazırda gənc basketbolçunun Filadelfiyaya keçməsi ilə bağlı nə plan, nə də hər hansı müraciət mövcuddur. Bundan əlavə, “Lakers” artıq Bronni Ceymsin 2026/27 mövsümü üçün 2,29 milyon dollarlıq müqaviləsini tam təmin edib və klub onun inkişafını Los-Ancelesdə davam etdirməyi planlaşdırır.
