Fransa millisinin sabiq yarımmüdafiəçisi Pol Poqba ilə “Monako”nun yolları ayrılıb. Tərəflər 2027-ci ilin yayına qədər qüvvədə olan müqaviləni qarşılıqlı razılıq əsasında vaxtından əvvəl ləğv ediblər. Beləliklə, 33 yaşlı futbolçu yenidən azad agent statusu alıb.
Poqba “Monako”ya 2025-ci ilin yayında azad agent kimi qoşulmuşdu. O, dopinq qaydalarının pozulmasına görə aldığı cəzanın başa çatmasından sonra karyerasını məhz Liqa 1 təmsilçisində bərpa etmişdi. Futbolçu ilə ikiillik müqavilə imzalanmışdı.
Zədələr Poqbanın geri dönüşünə mane oldu
Fransalı yarımmüdafiəçinin “Monako”dakı dövrü əsasən fiziki problemlərlə yadda qaldı. O, klubun heyətində cəmi 6 rəsmi matça çıxıb, bunlardan yalnız birinə start heyətində başlayıb. Ümumilikdə meydanda 115 dəqiqə keçirən Poqba qol və məhsuldar ötürmə ilə fərqlənə bilməyib.
Futbolçunun son dövrdə dizində problem yaşadığı, daha sonra isə bud nahiyəsindən zədə aldığı bildirilir. “Monako” tərəflərin əvvəlcədən müəyyənləşdirdiyi hədəflərə tam şəkildə çata bilmədiyini nəzərə alaraq əməkdaşlığın dayandırılması barədə razılığa gəldiyini açıqlayıb.
Poqba ayrılıqdan sonra klub rəhbərliyinə, komanda yoldaşlarına və azarkeşlərə təşəkkür edib, “Monako”da keçirdiyi müddəti özü üçün xüsusi təcrübə adlandırıb.
2018-ci ildə Fransa millisi ilə dünya çempionu olan yarımmüdafiəçi karyerası ərzində “Mançester Yunayted” və “Yuventus” kimi klublarda da çıxış edib. “Yuventus”la ardıcıl dörd dəfə İtaliya çempionluğunu qazanan Poqba 2016-cı ildə həmin dövr üçün dünya rekordu sayılan transfer məbləği ilə “Mançester Yunayted”ə qayıtmışdı. Hazırda Poqbanın karyerasını hansı klubda davam etdirəcəyi rəsmən açıqlanmayıb.
