Dördqat Formula 1 dünya çempionu Maks Ferstappen gələcəyi ilə bağlı qərarını verib. Niderlandlı pilot “Red Bull Racing”lə yeni müqavilə imzalayıb və 2030-cu il mövsümünün sonuna qədər komandada qalacaq. Klub və Formula 1 yeni anlaşmanı avqustun 20-də rəsmən təsdiqləyib.
28 yaşlı pilotun əvvəlki müqaviləsi 2028-ci ilin sonuna qədər qüvvədə idi. Beləliklə, yeni razılaşma Ferstappenin “Red Bull”dakı gələcəyini daha iki il uzadıb. Müqavilədə nəticələrə bağlı vaxtından əvvəl ayrılma bəndlərinin saxlanılıb-saxlanılmadığı isə açıqlanmayıb.
Ferstappen “Red Bull”la uzunmüddətli gələcəyini bağladı
Ferstappen “Red Bull” sisteminə 2014-cü ildə qoşulub, əsas komandada isə 2016-cı ildə debüt edib. O, “Red Bull”la ilk yarışında — İspaniya Qran-prisində qalib gələrək Formula 1 tarixinin ən gənc Qran-pri qalibinə çevrilmişdi.
Komandanın açıqladığı statistikaya əsasən, Ferstappenlə “Red Bull”un əməkdaşlığı indiyədək dörd pilotlar çempionluğu, iki Konstruktorlar Kuboku və 71 Qran-pri qələbəsi ilə nəticələnib.
Yeni müqaviləni şərh edən Ferstappen razılaşmanın uzadılmasından məmnun olduğunu bildirib və əsas məqsədin yenidən zirvəyə qayıtmaq olduğunu vurğulayıb. Pilot komandaya və rəhbərliyə ona göstərilən etimada görə təşəkkür edib.
Son dövrdə Ferstappenin gələcəyi ətrafında müxtəlif ehtimallar səsləndirilirdi. Onun adı xüsusilə “Mercedes” və “McLaren”lə hallandırılırdı. Yeni müqavilə isə niderlandlı pilotun ən azı 2030-cu ilin sonunadək “Red Bull” layihəsinin əsas siması olaraq qalacağını rəsmiləşdirib.
