Azərbaycanın kikboksinq və muay-tay döyüşçüsü Akif “King” Quluzadəni növbəti ciddi sınaq gözləyir. Ordu İdman Klubunun üzvü sentyabrın 4-də Tailandın paytaxtı Banqkokda keçiriləcək The Inner Circle 29 turnirində rinqə çıxacaq.
21 yaşlı Azərbaycan təmsilçisinin rəqibi təcrübəli tailandlı döyüşçü Ferrari Fairtex olacaq. Qarşılaşma məşhur “Lumpinee Stadium” arenasında bantam çəkidə kikboksinq qaydaları üzrə keçiriləcək. Quluzadə bu döyüşdə flyweight-dən bantam çəkiyə yüksələrək yeni divizionda debüt edəcək.
Quluzadəni təcrübəli rəqib gözləyir
Ferrari Fairtex üçün də bu qarşılaşma yeni sınaq olacaq. 29 yaşlı tailandlı karyerasında ilk dəfə kikboksinq qaydaları ilə döyüşəcək. O, daha çox muay-tayda qazandığı uğurlarla tanınır və 2021-ci ildə Tailandın İdman Jurnalistləri Assosiasiyası tərəfindən ilin döyüşçüsü seçilib.
Ferrari son qarşılaşmasını iyunda keçirib. O, yaponiyalı Şinji Suzukini üç raundun yekununda hakimlərin yekdil qərarı ilə məğlub edib.
Quluzadə isə ONE arenasında indiyədək 6 döyüş keçirib və onların 5-də qələbə qazanıb. Azərbaycanlı döyüşçü yalnız bir qarşılaşmada məğlubiyyətlə üzləşib.
Akif Quluzadə – Ferrari Fairtex görüşü The Inner Circle 29-un əsas döyüşü olacaq. Beləliklə, sentyabrın 4-də Banqkokda hər iki idmançı üçün fərqli sınaq yaşanacaq: Quluzadə yeni çəki dərəcəsində, Ferrari isə kikboksinq qaydalarında ilk dəfə qüvvəsini sınayacaq.
