Beynəlxalq Futbol Federasiyasının (FİFA) 2027-ci ildə keçiriləcək prezident seçkiləri üçün namizədlik müraciətlərinin qəbulu başa çatıb. Qurumun hazırkı rəhbəri Canni İnfantino ilə yanaşı, Fransa Futbol Federasiyasının prezidenti Filipp Diallo və Yaponiya Futbol Assosiasiyasının sabiq rəhbəri Kozo Taşima da seçkilərdə iştirak etmək üçün sənədlərini təqdim ediblər.
FİFA-nın rəsmi açıqlamasına əsasən, prezident seçkiləri 18 mart 2027-ci ildə Mərakeşdə təşkil olunacaq. Namizədlərin müraciətləri müvafiq yoxlamaların aparılması və onların seçkilərə buraxılması barədə qərar verilməsi üçün Seçki Komitəsinə göndərilib.
Qurum bildirib ki, prezident seçkiləri ilə bağlı proses FİFA Şurasının 29 aprel 2026-cı ildə qəbul etdiyi qərardan sonra başlayıb. Üzv federasiyalar tərəfindən irəli sürülən namizədlərin sənədləri müəyyən edilmiş müddət ərzində qəbul olunub.
FİFA prezident seçkilərində iştirak şərtləri
FİFA-nın qaydalarına görə, prezidentliyə namizəd olmaq istəyən şəxs təşkilata üzv olan 211 milli futbol federasiyasından ən azı beşinin yazılı dəstəyini qazanmalıdır. Müraciətlərin təqdim edilməsi üçün son tarix noyabrın 18-i gecə yarısı olub.
Seçki Komitəsi namizədlərin sənədlərini və müəyyən edilmiş tələblərə uyğunluğunu araşdıracaq. Yoxlamaların nəticələrinə əsasən, seçkilərdə iştirak hüququ qazanan şəxslərin adları ən gec 18 fevral 2027-ci ildə üzv federasiyalara bildiriləcək.
Rəsmi siyahı açıqlanmazdan əvvəl dörd nəfər prezident seçkilərində iştirak etmək niyyətini bəyan etmişdi. Onların arasında İsveçrə millisinin və İngiltərənin “Tottenhem” klubunun sabiq futbolçusu, 55 yaşlı Ramon Veqa da var idi. Lakin onun adı FİFA-nın qəbul etdiyi üç müraciət arasında yer almayıb.
2016-cı ildən təşkilata rəhbərlik edən İnfantino növbəti müddətə seçilmək niyyətindədir. Bununla belə, onun FİFA turnirlərinə özəl investisiyaların cəlb olunması ilə bağlı təşəbbüsləri beynəlxalq futbol ictimaiyyətində tənqidlərlə qarşılanıb.
UEFA prezidenti Aleksander Çeferin İnfantinoya qarşı seçkilərdə iştirak etməyəcəyini açıqlayıb. Avropa futbol qurumu isə Fransa Futbol Federasiyasının rəhbəri Filipp Diallonun namizədliyini dəstəkləyir.
FİFA prezidentliyinə namizədlər kimlərdir?
Canni İnfantino
56 yaşlı İsveçrə əsilli italiyalı hüquqşünas 2016-cı ildə korrupsiya qalmaqalından sonra vəzifəsini tərk edən Zepp Blatteri əvəzləyərək FİFA prezidenti seçilib.
Onun rəhbərliyi dövründə dünya çempionatının iştirakçı sayı 32-dən 48-ə çatdırılıb. Eyni zamanda, mundiallarda VAR (video köməkçi hakim) sisteminin tətbiqinə başlanılıb.
İnfantinonun FİFA yarışlarına özəl sərmayələrin cəlb edilməsi ilə bağlı planları isə müxtəlif futbol təşkilatlarının narazılığına səbəb olub. Bu təşəbbüslərin uğursuzluqla nəticələnməsindən sonra onun istefasını tələb edənlər də olub.
Kozo Taşima
Noyabrın 21-də 69 yaşını tamamlayacaq Kozo Taşima keçmiş yaponiyalı futbolçudur. O, vaxtilə Yaponiya millisində çıxış edib, daha sonra ölkənin gənclər yığmalarında məşqçi kimi fəaliyyət göstərib.
Taşima Yaponiya Futbol Assosiasiyasında baş katib və prezident vəzifələrini tutub. Hazırda təşkilatın fəxri prezidenti statusunu daşıyır.
Yaponiyalı funksioner 2015-ci ildən Asiya futbol federasiyalarını FİFA-nın rəhbər strukturlarında təmsil edir.
Filipp Diallo
63 yaşlı Filipp Diallo 2023-cü ildən Fransa Futbol Federasiyasının (FFF) prezidentidir. O, beynəlxalq futbol idarəçiliyində digər namizədlərlə müqayisədə daha yeni sima hesab olunur.
Diallo 2023-cü ilin aprelində UEFA-nın İcraiyyə Komitəsinə seçilib və Avropa futbolunun idarə olunmasında iştirak etməyə başlayıb.
Fransalı funksioner prezidentliyə namizədliyini elan edərkən FİFA-nın mövcud rəhbərliyini sərt tənqid edib. O, hazırkı administrasiyanı idmanın nüfuzuna və futbolun imicinə zərər vurmaqda, həmçinin futbol ictimaiyyətində parçalanmanı dərinləşdirməkdə ittiham edib.
Beləliklə, FİFA prezidentliyi uğrunda mübarizədə üç namizədin iştirakı gözlənilir. Yekun siyahı Seçki Komitəsinin yoxlamalarından sonra təsdiqlənəcək, təşkilatın növbəti rəhbəri isə martın 18-də Mərakeşdə keçiriləcək seçkilərdə müəyyənləşəcək.





